220 oqýshy Qanıpa Bitibaeva atyndaǵy olımpıadaǵa qatysyp jatyr
ASTANA. KAZINFORM — 27-30 sáýir aralyǵynda Óskemen qalasynda daryndy balalarǵa arnalǵan Jambyl atyndaǵy oblystyq mamandandyrylǵan mektep-gımnazııa-ınternaty bazasynda Qazaqstan Respýblıkasynyń eńbek sińirgen muǵalimi Qanıpa Omarǵalıqyzy Bitibaeva atyndaǵy qazaq tili men ádebıetinen dástúrli respýblıkalyq olımpıada ótip jatyr. Bul týraly Oqý-aǵatý mınıstrligi málimdedi.
— Olımpıadaǵa respýblıkanyń bilim berý uıymdarynyń 9-11 synyp oqýshylary arasynan óńirlik irikteý kezeńinen ótken 220 oqýshy qatysýda. Olımpıadanyń maqsaty — oqýshylardyń qazaq tili men ádebıeti páni boıynsha bilimderin tereńdetý jáne jetildirý, ulttyq mádenıet pen dástúrdi qurmetteýge tárbıeleý, sondaı-aq olardyń zııatkerlik jáne shyǵarmashylyq qabiletterin damytý, — dep jazdy vedomstvodan.
Respýblıkalyq kezeń eki aınalymnan turady. Onyń birinde oqýshylar esse jazsa, ekinshi aınalymda synaqty aýyzsha tapsyrady.
Mınıstrliktiń málimetinshe, qatysýshylar qazaq tili men ádebıeti shyǵarmalary, Q.O. Bitibaevanyń ómirbaıany, ǵylymı-pedagogıkalyq murasy jáne pýblıtsıstıkalyq eńbekteri boıynsha bilimderin sarapqa salady. Olımpıada jeńimpazdary men júldegerleri Qazaqstan Respýblıkasy Oqý-aǵartý mınıstrliginiń I, II, III dárejeli dıplomdarymen marapattalady.
Aıta keteıik, buǵan deıin qyzylordalyq jas hımık Mendeleev halyqaralyq olımpıadasynyń altyn medalin jeńip alǵan bolatyn.
