22 jyldan beri ıt jattyqtyryp júrgen ofıtser áıeldi bilesiz be
ALMATY. QazAqparat - Almatyda erlermen qatar qıyn da jaýapty qyzmette eńbek etetin arýlar bar. Sonyń biri - Ánel Bolǵymbaeva. Halyqaralyq áıelder kúni qarsańynda QazAqparat tilshisi QR ІІM kınologııa ortalyǵynyń bastyǵy, polıtsııa podpolkovnıgi Ánel Bolǵymbaevamen áńgimelesken edi.
Ánel Bolǵymbaeva ómiri men qyzmetin kınologııa salasyna arnaǵan. Aıtýynsha, ıt asyrap, olarǵa kútim jasap, jattyqtyrý - bala kúnnen bergi súıikti isi.
«Halqymyzda «It - jeti qazynanyń biri» dep beker aıtylmaǵan. Men bala kezimnen bul janýarlardy asyrap, olarǵa qamqorlyq kórsetkendi jaqsy kórdim. Tipti, jaı ǵana kózqarasynan olarǵa ne qajet ekenin, kóńil-kúıi qandaı ekenin jaqsy túsinip qoıamyn. Sondyqtan bolar, bolashaǵymdy kınologııa salasymen baılanystyrǵym keldi»,- deıdi keıipkerimiz.
Búginde podpolkovnık Ánel Bolǵymbaevanyń kınologııa salasyndaǵy eńbek ótili 22 jyl bolǵan.
Alǵashqy qyzmetin ol Shyǵys Qazaqstan oblysynda kishi serjant sheninde «kishi ınspektor-kınolog» bolyp bastaǵan.
«2018 jyly maǵan Almaty qalalyq polıtsııa departamentiniń kınologııalyq qyzmet ortalyǵyn basqarýǵa shaqyrý tústi. Keıin Almatyda QR ІІM kınologııalyq ortalyǵynyń bastyǵy bolyp taǵaıyndaldym»,- dedi ol.
Keıipkerimiz qyzmetinde bilikti basshy bola bilse, otbasynda súıikti de meıirimdi ana. Onyń eki qyzy bar.
«Eki qyzym ózim sekildi janýarlardy óte jaqsy kóredi. Bul - jaqsy qasıet. Sebebi, sol arqyly olardyń aınalasyna degen qamqorlyq, jaýapkershilik jáne mahabbaty qalyptasady»,- dedi ol.
Ánel Bolǵymbaeva - óz qyzmetine adal adam. Tipti, áıelder merekesi qarsańynda da úıde jatpaı, qyzmetinde júr.
Sebebi, óziniń aıtýynsha, bir de bir kúnin jumystaǵy janýarlardy kórmeı ótkize almaıdy.
«Barlyq qyz-kelinshekterdi, analardy Halyqaralyq áıelder kúnimen quttyqtaımyn. Olarǵa eń bastysy densaýlyq, áıel baqytyn, súıikti jar, ana jáne baqytty bolýyn tileımin»,- dep óziniń aq tilegin jetkizdi QR ІІM Kınologııa ortalyǵynyń bastyǵy, polıtsııa podpolkovnıgi Ánel Bolǵymbaeva.
