22 jyl boıy jylýsyz otyrǵan astanalyq ákimdikke shaǵymdandy
ASTANA. QazAqparat - Astananyń Saryarqa aýdanyna qaraıtyn Avtomatıka aýylyndaǵy №6 úıdiń turǵyny qala ákiminiń birinshi orynbasary Sergeı Horoshýnǵa shaǵymdandy, dep habarlaıdy QazAqparat tilshisi.
«22 jyl boıy jylýsyz turý múmkin be? Joq. 2014 jyldan beri úıimizdi turýǵa jaramsyz etip tapsyn dep jantalasyp kelemin. Apatty úıler tizimine 47% tozǵan dep kórsetedi. Birinshiden, komıssııa jalǵan tehnıkalyq akt jasady. Jylý qubyry trassasynyń 80% tozǵan dep jazylǵan. Jylý qubyry joq bolsa, qalaı tozady? Gaz joq, ystyq sý joq, káriz júıesi eki jyldan beri jertólege aǵyp júr. Óz kúshimizben jóndep kórdik, biraq qys kelisimen jylý bolmaı, qubyrlar taǵy jarylady, taǵy da jertólege baryp quıylady (...) Munda 6 úı, 1 balabaqsha jáne 1 dúken boldy. Bes úıdi apatty dep tanyp, basqa jaqqa kóshirdi. Al bizdiń bes qabatty úıdi qaldyrdy. Biz onda mamonttar sekildi qyrylyp qalatyn shyǵarmyz», - dedi turǵyn birinshi orynbasardyń esep berý jıynynda.
Úı turǵyny apatty úıde zeınetkerler turatynyn atap ótti. Olar qys mezgilinde «býrjýıka» peshterin qoldanyp, besinshi qabatqa kómir tasýǵa májbúr bolady.
Sergeı Horoshýn óz jaýabynda máseleli úı týraly habardar ekenin aıtty.
«Bul bes qabatty turǵyn úı DSK panelinen turǵyzylǵan. Konstrýktsııalar boıynsha tujyrymdamaǵa sáıkes másele týyndamady. Biraq, Siz ótinish aıtyp otyrǵandyqtan, kelesi aptada ózim shyǵyp aýdandyq ákimdikpen jáne turǵyn úı ınspektsııasymen baramyn. Máseleni sheshýge tyrysamyn», - dep jaýap berdi Astana ákiminiń birinshi orynbasary.
