22 jeltoqsanda UBT-ǵa qatysý úshin ótinish qabyldaý bastalady
ASTANA. KAZINFORM – Qańtar aıynda ótetin UBT-ǵa qatysý úshin ótinish qabyldaý 22 jeltoqsanda bastalyp, 30 jeltoqsanǵa deıin jalǵasady. Bul týraly Ǵylym jáne joǵary bilim mınıstrliginiń baspasóz qyzmeti habarlady.
UBT-ǵa tirkelý Ulttyq testileý ortalyǵynyń app.testcenter.kz saıtynda nemese UTO qosymshasy arqyly júrgiziledi. Testileýdiń ózi 10 qańtar men 10 aqpan aralyǵynda ótedi.
— Qańtardaǵy UBT-ǵa shartty túrde aqyly negizde kúndizgi oqý nysany boıynsha joǵary oqý oryndaryna qabyldanǵan, jazǵy UBT nátıjeleri boıynsha shekti ball jınamaǵandar, shyǵarmashylyq bilim berý baǵdarlamalarynyń toptarynan aqyly negizde basqa daıyndyq baǵyttaryna, pedagogıkalyq baǵytqa aqyly negizde aýysqysy keletinder, ótken jylǵy mektep jáne kolledj túlekteri, QR azamaty bolyp tabylmaıtyn ulty qazaq tulǵalar, shetelde bilim alǵan QR azamattary, sondaı-aq mektep bitiretin túlekter joǵary oqý oryndaryna aqyly negizde túsý úshin qatysady, — delingen habarlamada.
Ótinish berý barysynda qatysýshylar testileý ótkiziletin oryndy, kúndi jáne ýaqytty ózderi tańdaıdy.
— 2026 jyly Ulttyq biryńǵaı testileýdiń formaty ózgerissiz saqtalady. UBT qurylymy burynǵy qalpynda qalady: talapkerler úsh mindetti pándi jáne tańdaýy boıynsha eki beıindik pándi tapsyrady. UBT tapsyrmalarynyń jalpy sany — 120. Onyń ishinde «Qazaqstan tarıhy» páni boıynsha 20 tapsyrma, «Oqý saýattylyǵy» men «Matematıkalyq saýattylyq» pánderinen 10 tapsyrmadan, sondaı-aq eki beıindik pánniń árqaısysynan 40 tapsyrmadan beriledi. UBT boıynsha eń joǵary ball da ózgermeıdi jáne 140 ball, — delingen mınıstrlik habarlamasynda.
Aıta ketý kerek, bıyl Ulttyq testileý ortalyǵy talapkerlerdiń jeke arhetıpin eskere otyryp, Qazaqstannyń oqý oryndaryndaǵy laıyqty mamandyq pen bilim berý baǵdarlamasyn tańdaýǵa kómektesetin edunavigator.kz kásibı baǵdar berý platformasyn iske qosty. Platforma bolashaq mamandyqty sanaly túrde tańdaýǵa múmkindik berip, joǵary oqý oryndaryna túsý kezinde senimdilikti arttyrady.
UBT-ǵa daıyndyq sapasyn arttyrý maqsatynda baıqaý synaqtary iske qosyldy. Oqý jylynyń basynda Ulttyq testileý ortalyǵynyń resmı saıtynda talapkerlerge arnalǵan kómekshi materıaldar jarııalandy. Atap aıtqanda, usynylatyn ádebıetter tizimi, «Qazaqstan tarıhy» jáne «Dúnıejúzi tarıhy» pánderi boıynsha 100 negizgi tarıhı datanyń tizimi, «Informatıka» páni boıynsha termınder tizimi, sondaı-aq «Qazaq ádebıeti» men «Orys ádebıeti» pánderi boıynsha mindetti ádebı shyǵarmalardyń tizbesi usynyldy.
Sonymen qatar testileý baǵdarlamasynda barlyq talapker úshin kalkýlıator, hımııalyq elementterdiń perıodtyq kestesi jáne tuzdardyń erigishtik kestesi qoljetimdi bolady.
Testileý ýaqyty — 4 saǵat (240 mınýt). Bul rette erekshe bilim berý qajettilikteri bar balalar úshin usynylatyn qosymsha 40 mınýt ýaqyt saqtalatynyn aıta ketý kerek.
Aıta ketelik bıyl elde sheteldik 7 JOO-nyń fılıaly jumysyn bastaǵan edi.