22 jastaǵy jigittiń búıregin ruqsatsyz alǵan dárigerler sotqa kelmedi
AQTÓBE. QazAqparat - 22 jastaǵy Serikbolsyn Kósherbaıdyń qos búıregin ata-analarynyń, týǵan-týystarynyń ruqsatynsyz alǵan dárigerler búgin sot aldy daıyndyqqa kelmeı qaldy.
Jaýapkerler arasynda oblystyq ákimdik, oblystyq densaýlyq saqtaý basqarmasy men bas hırýrg Erlan Sultangereev bar, dep habarlaıdy QazAqparat tilshisi.
Basynan aýyr soqqy alyp, bas-mı jaraqatymen aýrýhanaǵa túsip, keıin jan tapsyrǵan Serikbolsyn Kósherbaıdyń qaryndasy Baldáýren Nurlybaeva azamattyq is boıynsha basty talapker boldy. Búgin №2 Aqtóbe qalalyq sotynda Baldáýren Nurbylaevanyń aryzy qaraldy.
«Biz talap aryzdy tolyqtyryp otyrmyz. Azamattyq kodeks boıynsha laýazymdy qyzmetker, jaýapty tulǵalardyń áreketterine zańdy tulǵalar jaýap beredi. Oblystyq bas hırýrgi Erlan Sultangereev oblystyq densaýlyq saqtaý basqarmasynda jumys istegendikten sol memlekettik mekeme jaýapty. Oblystyq densaýlyq saqtaý departamentinen, oblystyń bas hırýrginen 1 mıllıon teńgeden moraldyq shyǵyn talap etip otyrmyz. Sonymen qatar, «Aqtóbe» gazetiniń ıesi «Shamshyraq Aqtóbe» JShS-in úshinshi tarap retinde sotqa qatystyrýyn surap otyrmyz. Talap aryzymyz qanaǵattandyrylǵan jaǵdaıda bas hırýrg Erlan Sultangereevtiń málimdemesin joqqa shyǵarý týraly habarlama baspasózge shyǵýy kerek»,- dedi qorǵaýshy Qatarbaı Raısov.
Aıta keteıik, talapker oblystyq ákimdikti, oblystyq densaýlyq saqtaý basqarmasy men oblystyń bas hırýrgi Erlan Sultangereevti jaýapker retinde tanýdy surady. Al «Aqtóbe» gazeti úshinshi tarap bolady. Sýdıa A.Nurjanov talapkerdiń ótinishin qanaǵattandyrdy. Kelesi sot aldy daıyndyq aldaǵy seısenbi kúni bolady.
Buǵan deıin habarlaǵanymyzdaı , aqtóbelik dárigerler 22 jastaǵy jigittiń eki búıregin eki adamǵa esh ruqsatsyz salyp bergen bolatyn.
Bul oqıǵa boıynsha Densaýlyq saqtaý mınıstri Erjan Birtanov óz pikirin bildirgen edi .
