22 jastaǵy qazaqstandyq Soltústik Kıprde pyshaq jaraqatyn aldy
ASTANA. KAZINFORM – 22 jastaǵy qazaqstandyq Soltústik Kıprde pyshaq jaraqatyn alyp, aýrýhanaǵa jetkizildi. Bul habardy QR Syrtqy ister mınıstrligi rastady.
Jergilikti BAQ Nıkosııa qalasyndaǵy «Metropol» sýpermarketinde pyshaqpen shabýyl saldarynan eki adam jaraqat alǵanyn jarııalady. Aldyn ala málimet boıynsha, er adam belgisiz sebeppen áıeldi pyshaqtap óltirýge árekettengen. Shabýyldan keıin kúdikti ózine de qol salǵan.
Keıinirek, onyń jasandy tynys alý apparatyna qosylǵany jáne jaǵdaıy óte aýyr ekeni, tipti ómirine qaýip tónip turǵany habarlandy.
Al keıbir BAQ jábirlenýshiniń aty-jóni men sýretin jarııalady.
– QR Syrtqy ister mınıstrligi Soltústik Kıprde bizdiń azamatymyzǵa qatysty oryn alǵan oqıǵadan habardar. Qazirgi ýaqytta qazaqstandyq dıplomattar mán-jaıdy anyqtaýda jáne jergilikti quzyrly organdarmen baılanysta. Qosymsha aqparat resmı málimetterdiń túsýine qaraı usynylady. Bul másele Mınıstrliktiń baqylaýynda, – dep jaýap berdi QR SІM baspasóz qyzmeti.
Polıtsııanyń baspasóz qyzmeti taratqan málimetke sáıkes, oqıǵa saldarynan aýyr jaraqat alǵan áıel men shabýyl jasaǵan er adam Nıkosııadaǵy doktor Býrhan Nalbantoglý atyndaǵy memlekettik aýrýhanaǵa jetkizilgen. Qazirgi ýaqytta ekeýiniń de em-dom alyp jatqany habarlandy.
Polıtsııa oqıǵanyń naqty sebebi ázirge anyqtalmaǵanyn málimdedi. Іs boıynsha tergeý amaldary jalǵasyp jatyr.
Buǵan deıin QR SІM Serbııada qaza tapqan qazaqstandyq áıeldiń ólimin rastaǵan edi.
