22 járdemaqyǵa reforma júrgizilmeıdi – qaı tólemder ózgerissiz qaldy
ASTANA. KAZINFORM – Qazaqstanda ataýly áleýmettik qoldaý tetikterin jetildirý aıasynda barlyq járdemaqy ózgerip ketpeıdi. Tólemderdiń 22 túri burynǵy tártippen saqtalady. Bul týraly Eńbek jáne halyqty áleýmettik qorǵaý mınıstri Asqarbek Ertaev aıtyp berdi.
Respýblıkalyq bıýdjetten tólenetin 36 áleýmettik tólemniń 22-si burynǵy tártippen saqtalady.
– Onyń ishinde ıadrolyq synaqtar men saıası qýǵyn-súrginnen zardap shekken adamdarǵa beriletin tólemder bar. Zııandy eńbek jaǵdaılarynda jumys istegen adamdarǵa jáne múgedektigi bar adamdardyń jekelegen sanattaryna arnalǵan tólemder burynǵysha saqtalady, – dedi A. Ertaev Ortalyq kommýnıkatsııalar qyzmetinde.
Bul tólemder úshin úı sharýashylyǵynyń ál-aýqat deńgeıi eskerilmeıdi.
Mınıstrdiń aıtýynsha, jańa tásildiń maqsaty – áleýmettik kómekti qysqartý emes, ony naqty muqtaj adamdarǵa ádil ári ataýly túrde baǵyttaý.
14 tólem boıynsha muqtajdyq deńgeıin baǵalaý engiziledi. Shekteýler A jáne V sanatyndaǵy ál-aýqaty joǵary otbasylarǵa qatysty qoldanylady.
Orta tap pen áleýmettik osal otbasylar memlekettik qoldaý alý quqyǵyn saqtaıdy. Al erekshe qorǵaýǵa alynǵan sanattar úshin qoldanystaǵy kepildikter saqtalady.
– Otbasynyń tsıfrlyq kartasy biryńǵaı krıterıı qoldanýdy, otbasylardyń ál-aýqatyn turaqty túrde qaıta baǵalaýdy jáne jaǵdaıy nasharlaǵan kezde tólemderdi alý quqyǵyn qalpyna keltirýdi qamtamasyz etedi, – dedi Eńbek jáne halyqty áleýmettik qorǵaý mınıstri.
Buǵan deıin A. Ertaev birde-bir muqtaj qazaqstandyq qoldaýsyz qalmaıtynyn aıtqan edi.
Al járdemaqy úshin ajyrasýdyń aldyn alý úshin bólek turatyn ata-analar da balanyń otbasy quramyna engiziledi.
