22 talapkerdiń nátıjesi joıyldy: naýryz aıyndaǵy UBT qorytyndysy shyqty

ASTANA. KAZINFORM – Naýryz aıyndaǵy UBT-nyń birinshi aptasynda 21 myńǵa jýyq talapker test tapsyrdy, oqýshylardyń 57%-ǵa jýyǵy shekti ball jınady. Bul týraly Ǵylym jáne joǵary bilim mınıstrligi habarlaıdy. 

Aqparatta aıtylǵandaı, testileý nátıjesi boıynsha ortasha ball — 53 (5 pán boıynsha), eń joǵary ball — 135, ony Abaı oblysynyń oqýshysy jınady. Test tapsyrýshylardyń 62,8%-y qazaq tilin, 37%-y orys tilin jáne 52 talapker aǵylshyn tilin tańdady. 

UBT-ǵa qatysqandardyń basym bóligi, atap aıtqanda, 18,4%-y «Matematıka-Fızıka» pánderin, 16,1%-y «Shyǵarmashylyq emtıhan» jáne 12%-y «Bıologııa-Hımııa» kombınatsııasyn tańdaǵan. Eń az tańdalǵan kombınatsııa — «Hımııa-Fızıka», ony 35 talapker tańdady. 

— Naýryzdaǵy UBT-ǵa 69 erekshe qajettiligi bar talapker qatysty. Testileý aıaqtalǵan soń 30 mınýttyń ishinde apellıatsııaǵa berý múmkindigi bar, bul jaǵdaıda sertıfıkat apellıatsııa týraly sheshim qabyldanǵannan keıin testilenýshiniń jeke kabınetinde qoljetimdi. Qazir 22 talapkerdiń nátıjesi joıyldy. Onyń ishinde 10 talapker smartfon jáne shpargalka sııaqty tyıym salynǵan zattardy alyp ótý áreketi saldarynan test tapsyrý múmkindiginen aıyryldy, al testileý kezinde erejelerdi buzǵany úshin aýdıtorııadan 12 adam shyǵaryldy. Ózge tulǵalar anyqtalǵan joq, - delingen habarlamada. 

Sondaı-aq mınıstrlik bıylǵy UBT aıaqtalǵannan keıin 31 qazanǵa deıin testileýdiń beınejazbalaryna taldaý júrgiziledi. Tyıym salynǵan zattardy paıdalaný nemese erejelerdi buzý faktileri anyqtalǵan jaǵdaıda talapkerdiń UBT nátıjesi joıylatynyn eskertti. 

Eske sala ketsek, 1 naýryz ben 6 sáýir aralyǵynda kóktemgi ulttyq biryńǵaı testileý ótedi, oǵan 163 myńǵa jýyq talapker ótinim bergen.