22 shildede Jerge magnıttik daýyl jetedi
ASTANA. KAZINFORM – 22 shildede Kúndegi tájdik tesikten taraǵan jyldam kún jeliniń áserinen Jerde G1–G2 deńgeıindegi magnıttik daýyl kútiledi, dep habarlaıdy TASS agenttigi.
TASS málimetinshe, Reseı ǵylym akademııasynyń Ǵaryshtyq zertteýler ınstıtýty men Sibir bólimshesiniń Kún-jer fızıkasy ınstıtýtynyń Kún astronomııasy zerthanasy 22 shildede Jerde G1–G2 deńgeıindegi magnıttik daýyl bolatynyn málimdedi. Oǵan Kúndegi kezekti tájdik tesikten shyqqan jyldam kún jeli sebep bolady.
– Bıylǵy jazda geomagnıttik belsendilik óte tómen bolyp turǵan jaǵdaıda, eki kúnnen keıin Jerge kezekti tájdik tesikten shyqqan jyldam kún jeli jetip, az da bolsa geomagnıttik belsendilik baıqalady, – delingen zerthana habarlamasynda.
Mamandardyń aıtýynsha, geomagnıttik belsendiliktiń kúsheıýi 21 shildeden 22 shildege qaraǵan túni bastalyp, keminde bir táýlikke sozylady. Eń joǵary kezeńinde G1–G2 deńgeıindegi magnıttik daýyl bolýy múmkin.
Al G3 jáne odan joǵary deńgeıdegi kúshti magnıttik daýyldardyń yqtımaldyǵy shamamen 5 paıyzdy quraıdy.
Eske sala ketsek, keshe Kúnde qýatty jarqyl tirkelgenin jazdyq.
