22 saǵat aspanda: jolaýshylar tarıhtaǵy eń uzaq áýe saparyna daıyn ba
ASTANA. KAZINFORM — Qantas avstralııalyq áýekompanııasy Airbus A350-1000ULR ushaǵynda 22 saǵatqa deıingi uzaq qashyqtyqqa ushýlardy bastaıdy, dep jazdy Euronews.
Ushaqta jolaýshylar úshin jańa jaıly múmkindikter qarastyrylǵan, onyń ishinde «saýyqtyrý aımaǵy» bolady.
Áýe kompanııasy tarıhtaǵy eń uzaq kommertsııalyq reısterdi — aıaldamasyz 22 saǵatqa deıin sozylatyn ushýlardy iske qosýǵa daıyndalyp jatyr. Jańa baǵyt Sıdneı qalasynan London jáne Nıý-Iork qalalaryna jalǵasady.
Ushýlar arnaıy túrlendirilgen Airbus A350-1000ULR (Ultra Long Range) ushaǵymen oryndalady. Bul ushaqtar qosymsha janarmaı bagynyń arqasynda áýede uzaq ýaqyt bola alady.
Qazirgi ýaqytta eń uzaq turaqty reısti Singapore Airlines oryndaıdy. Nıýark pen Sıngapýr arasyndaǵy ushý shamamen 18,5 saǵatqa sozylady.
Jańa ushaqtardyń basty ereksheligi — «jaqsy kóńil-kúı aımaǵy» (wellbeing zone). Bul — barlyq jolaýshylarǵa qoljetimdi, salondar arasyndaǵy arnaıy keńistik. Munda boı jazyp, beınenusqaýlyqtar boıynsha jattyǵý jasaýǵa, sondaı-aq sýsyndar men jeńil taǵamdar alýǵa bolady. Bul tujyrymdama djetlag áserin azaıtýǵa jáne uzaq ushý kezindegi jaǵdaıdy jaqsartýǵa baǵyttalǵan.
Standartty A350-1000 ushaǵy 300-den astam jolaýshyǵa eseptelgen bolsa, Qantas ushaqtary 238 adamdy ǵana tasymaldaıdy. Bos keńistik jaılylyqty arttyrýǵa jumsalǵan: uzyndyǵy shamamen eki metr bolatyn jeke tósegi bar alty birinshi klasty lıýks, tolyq jatatyn kreslolary bar 52 bıznes-klass orny, 40 premıým-ekonom jáne 140 ekonom-klass orny qarastyrylǵan.
Barlyq jolaýshylar joǵary jyldamdyqty Wi-Fi jelisine qol jetkize alady, sondaı-aq Bluetooth qulaqqaptaryn borttyq oıyn-saýyq júıesine qosýǵa múmkindik bolady.
Joba Project Sunrise dep atalady. Ol alǵash ret 2017 jyly jarııalanǵan, alaıda COVID-19 pandemııasyna baılanysty merzimder keıinge shegerildi. Reısterdi iske qosý 2027 jyldyń birinshi jartysyna josparlanyp otyr.
Buǵan deıin jolaýshylar aǵyny boıynsha kóshbasshy áýejaılar týraly jazdyq.
Al byltyr Aq úı Qatar koroldik otbasymen Boeing 747 lıýks ushaǵyn prezıdenttik bort (Air Force One) retinde paıdalaný úshin AQSh-qa berý týraly kelissóz júrgizgen bolatyn.
