22 naýryzda nóser jańbyr jaýyp, jel kúsheıedi
NUR-SULTAN. QazAqparat - Sınoptıkter 22 naýryz kúni Qazaqstanda aýa raıy qandaı bolatynyn aıtty, dep habarlaıdy QazAqparat.
«Qazgıdromet» RMK málimetinshe, 22 naýryzda soltústik tsıklon jáne onymen baılanysty atmosferalyq fronttardyń áserinen Qazaqstannyń basym bóliginde jaýyn-shashyn (kóbine jańbyr) bolady. Elimizdiń ońtústik-shyǵysy men shyǵysyndaǵy taýly aýdandarda nóser jańbyr jaýady.
Tek elimizdiń batysy men ońtústik-batysynda aýa raıy jaýyn-shashynsyz, kún ashyq bolady. Respýblıkanyń keı jerlerinde jel kúsheıip, tuman, kóktaıǵaq saqtalady. Soltústikte jaıaý burqasyn soǵady.
Aqmola oblysynyń keı jerlerinde tuman, kóktaıǵaq kútiledi, túnde jel 15-20, ekpini 25 m/s, kúndiz keı jerelerinde 15-20 m/s kúsheıedi.
Soltústik Qazaqstan, Pavlodar oblystarynyń keı jerlerinde tuman, kóktaıǵaq kútiledi, basym bóliginde jel jyldamdyǵy 15-20, 23-28 m/s jetedi. Soltústik Qazaqstan oblysynyń keı jerlerinde jaıaý burqasyn kóteriledi.
Shyǵys Qazaqstan oblysynyń keı jerlerinde tuman túsip, kóktaıǵaq bolady. Sekýndyna 15-20, 25 metr jyldamdyqpen kúshti jel turady.
Mańǵystaý, Atyraý, Batys Qazaqstan, Jambyl oblystarynyń keı jerlerinde tuman túsedi. Jambyl oblysynyń keı jerlerinde jel qarqyny 15-20 m/s deıin kúsheıedi.
Qostanaı, Qaraǵandy oblystarynyń keı jerlerinde tuman, kóktaıǵaq kútiledi, jel ekpini - 15-20 m/s.
Almaty, Túrkistan oblystarynda keı jerlerde jel 15-20 m/s kúsheıedi.
