22 mlrd teńgeden astam aıyppul keshirildi: ІІM raqymshylyqtyń nátıjesin jarııalady
ASTANA. KAZINFORM — ІІM raqymshylyq týraly zańnyń júzege asyrylýy jóninde málimet berdi.
1 shildede Memleket basshysy Qazaqstan Respýblıkasynyń jańa Konstıtýtsııasynyń qabyldanýyna oraı jarııalanǵan raqymshylyq týraly zańǵa qol qoıdy. Bul — adamgershilik pen izgilikti negizge alǵan mańyzdy sheshim.
Sonymen qatar amnıstııa qoǵamnyń qaýipsizdigine qaýip tóndirmeıtin jáne azamattardyń quqyqtaryna nuqsan keltirmeıtin jaǵdaılarda ǵana qoldanylady. Táýelsiz Qazaqstan tarıhynda alǵash ret ákimshilik raqymshylyq ótkizildi. Onyń aıasynda zańda kórsetilgen baptar boıynsha azamattar ákimshilik aıyppul tóleýden bosatyldy. Іshki ister organdarynyń baǵyty boıynsha amnıstııa shamamen 590 myń azamatqa qatysty qoldanyldy.
Nátıjesinde olarǵa qatysty 1,3 mıllıonnan astam ákimshilik óndirip alý toqtatylyp, jalpy somasy 22 mıllıard teńgeden asatyn aıyppul esepten shyǵaryldy.
— Raqymshylyq — bir rettik izgilik sharasy. Ol bolashaqta jasalatyn quqyq buzýshylyqtar úshin jaýapkershilikten bosatpaıdy. Eger azamat qaıtadan quqyq buzsa, ol zań talaptaryna sáıkes tolyq jaýapkershilikke tartylady. Іshki ister mınıstrligi azamattardy zań talaptaryn saqtaýǵa, ózgelerdiń quqyqtaryn qurmetteýge shaqyrady. Quqyq buzýshylyq jasamaý — jaýapkershilikten saqtanýdyń eń durys joly. Al «Zań jáne tártip» qaǵıdatyn saqtaý — qaýipsiz ári ádiletti qoǵamnyń basty negizi, — dedi QR ІІM ÁPK tóraǵasy Murat Qabdenov.
Aıta ketelik Prezıdent raqymshylyq týraly zańǵa qol qoıdy: 1 mıllıonǵa jýyq aıyppul keshiriletini týraly jazǵan edik.
