22 myńnan astam jas óz kásibin ashýǵa memlekettik grant aldy
ASTANA. KAZINFORM — Qazaqstanda keıingi eki jylda 22,6 myń jas azamat óz kásibin bastaý úshin qaıtarymsyz memlekettik grant aldy. Bul týraly Mádenıet jáne aqparat vıtse-mınıstri Evgenıı Kochetov Halyqaralyq jastar kúnine arnalǵan brıfıngte málimdedi.
Vıtse-mınıstrdiń aıtýynsha, jastar kásipkerligin damytýǵa jáne olardyń óz isin bastaýyna jaǵdaı jasaýǵa erekshe kóńil bólinip otyr.
— Keıingi eki jylda 192 myń jas kásipkerlik negizderin meńgerip, 22,6 myń adam óz isin bastaý úshin qaıtarymsyz memlekettik grant aldy, — dedi Evgenıı Kochetov.
Sonymen qatar ol jastardy jumyspen qamtýǵa baǵyttalǵan birqatar baǵdarlama júzege asyrylyp jatqanyn tilge tıek etti.
— 2025 jyldyń qorytyndysy boıynsha, jastar arasyndaǵy jumyssyzdyq deńgeıi 3,1 paıyz. Al sońǵy eki jylda 1,4 mıllıonǵa jýyq jas jumyspen qamtýǵa járdemdesý sharalaryna qatysty, — dedi spıker.
Evgenıı Kochetovtiń málimetinshe, qazir elimizde 235 jastar resýrstyq ortalyǵy jumys isteıdi. Olar jastarǵa bilim alý, jumysqa ornalasý jáne turǵyn úı máseleleri boıynsha keńes berip, psıhologııalyq jáne quqyqtyq kómek kórsetedi.
Aıta keteıik, buǵan deıin bıyl túlekter arasyndaǵy grant konkýrsyna qatysyp, memlekettik bilim grantyna ıe bola almaǵan talapkerler úshin birneshe balama múmkindik qarastyrylǵanyn habarladyq.
