22 myń SIM-karta tárkilendi: alaıaqtarǵa akkaýnt satqan «aktıvatorlar» ustaldy
ASTANA. KAZINFORM — Bıylǵy 9 aıda ınternet-alaıaqtyq boıynsha kórsetkish tómendedi.
Bul týraly QR ІІM Kıberqylmysqa qarsy is-qımyl departamentiniń bastyǵy Jandos Súıinbaı Ortalyq kommýnıkatsııalar qyzmetinde ótken brıfıngte aıtty.
— Jyl basynan tirkelgen ınternet-alaıaqtyqtardyń sany 19 myńnan 15 myńǵa deıin, ıaǵnı 21%-ǵa azaıdy, — dedi ol.
Spıkerdiń sózinshe, uıymdastyrýshylyq-praktıkalyq jáne aldyn alý sharalary oń nátıje berip otyr. Baılanys operatorlarymen birlesip, alaıaqtardyń telekommýnıkatsııalyq ınfraqurylymdy paıdalanýyna júıeli túrde tosqaýyl qoıylyp jatyr.
— Jyl basynan beri 90 mıllıonnan astam alaıaqtyq qońyraý buǵattaldy, — dedi departament basshysy.
Sondaı-aq ol alaıaqtyq shemalarǵa qatysatyn «aktıvatorlar» týraly aıtty. Bular messendjer akkaýnttaryn óz atyna tirkep, alaıaqtarǵa usynatyn adamdar.
— Olar, messendjer akkaýnttaryn ózderine tirkep, ony alaıaqtarǵa usynatyn adamdar. Búgingi tańda 150-den astam «aktıvator» ustaldy, olardan 22 myńnan astam SIM-karta tárkilendi, — dep tolyqtyrdy.
Brıfıngte droptar týraly da aıtyldy. Olar bank kartalaryn óz atyna rásimdep, az aqyǵa alaıaqtarǵa beredi. Mysaly, qyrkúıekte Túrkistan oblysynda osyndaı toptyń áreketi toqtatyldy. Top Ózbekstannyń 27 azamatyn tartqan. Olardyń atyna urlanǵan aqshany qolma-qol aqshaǵa aınaldyrý úshin bank shottary ashylǵan.
Aıta keteıik, buǵan deıin úsh aıda 1595 kıberqylmys anyqtalǵanyn jazdyq.
