20 jyl kútken úmit aqtaldy – Otbasy bank kezek kútkenderdi qýantty
ASTANA. KAZINFORM – Olardyń arasynda kezeginiń kelýin 20 jyldan astam kútken azamattar da bar. Búginde olar jaldamaly turǵyn úıge kirip otyr. Bolashaqta bul turǵyn úılerdi jekeshelendirýge bolady.
2025 jyldyń qyrkúıeginen beri jergilikti atqarýshy organdar Otbasy bankke 20321 jaldamaly páter tapsyrǵan-dy. Búginde olardyń basym bóligi turǵyn úı kezeginde turǵan azamattarǵa úlestirildi.
Otbasy bank basqarma tóraıymy Lázzat Ibragımovanyń aıtýynsha, jaldamaly turǵyn úı — óz kúshimen baspana satyp alý múmkindigi shekteýli azamattar úshin turǵyn úı máselesin sheshýdiń eń qoljetimdi tetikteriniń biri.
— Jaldamaly turǵyn úıdi kezekte turǵan azamattardyń baspana máselesin sheshýdiń eń tıimdi joly dep esepteımiz. Óıtkeni olardyń arasynda tabysy tómen, bastapqy jarna jınaýǵa nemese ıpotekalyq qaryzdy óteýge múmkindigi joq kisiler bar. Al jaldamaly baspana olarǵa qazirdiń ózinde qaýipsiz ári jaıly turǵyn úıge qonystanýǵa múmkindik beredi. Endi mundaı otbasylarǵa turǵylyqty jerin jıi aýystyryp, balalaryn bir mektepten nemese balabaqshadan ekinshisine kóshirýdiń qajeti bolmaıdy. Mundaı qoldaý ásirese kópbalaly otbasylar, múgedektigi bar azamattar, jetim balalar, jesir qalǵan azamattar úshin asa mańyzdy. Memlekettiń kómeginsiz olardyń turǵyn úı máselesin sheshýi óte qıyn, — deıdi Lázzat Ibragımova.
Bank arqyly áleýmettik osal sanattaǵy myńdaǵan qazaqstandyq jaldamaly turǵyn úıge qonystandy. Sandarǵa shaqsaq, 3239 kópbalaly otbasy baspanamen qamtyldy. Sondaı-aq I jáne II toptaǵy múgedektigi bar 2681 qazaqstandyq jáne múgedektigi bar balalardy tárbıelep otyrǵan 2211 otbasy jaldamaly turǵyn úı aldy.
Budan bólek, «jetim balalar jáne ata-anasynyń qamqorlyǵynsyz qalǵan balalar» sanaty boıynsha turǵyn úı kezeginde turǵan 2328 azamat úıli boldy. Bul sanat úshin zańnamalyq deńgeıde arnaıy kvota qarastyrylǵan: olarǵa bólinetin turǵyn úıdiń jalpy kóleminiń keminde 20 paıyzy berilýi tıis. Mundaı tetik jyldar boıy kezekte turǵan azamattardyń baspanaǵa qol jetkizý múmkindigin aıtarlyqtaı arttyrady.
Jaldamaly turǵyn úı alǵandardyń qatarynda 859 jesir kisi bar. Bul — turǵyn úımen qamtamasyz etý júıesindegi jańa jeke sanattardyń biri. Buǵan deıin jesirler «tolyq emes otbasylar» sanatyna jatqyzylatyn. Bul turǵyn úı kezegindegi eń kóp sanattardyń biri bolǵandyqtan, olardyń baspana kútý merzimi uzaryp ketetin. Endi jeke sanattyń engizilýi memlekettik qoldaýdy naqty muqtaj azamattarǵa neǵurlym ataýly ári ýaqytyly kórsetýge jol ashpaq.
Jaldamaly turǵyn úı tetigi baspana satyp alýǵa qarjylyq múmkindigi jetpeıtin azamattar úshin turǵyn úı máselesin sheshýdiń mańyzdy quraldarynyń birine aınalyp otyr. Bul tek páter berý emes, otbasylarǵa turaqty ómir súrý ortasyn qalyptastyrýǵa, balalardyń bir mektepte bilim alýyna jáne azamattardyń erteńgi kúnge senimdiligin arttyrýǵa múmkindik beretin áleýmettik qoldaý sharasy.
