22 maýsymda el aýmaǵynyń basym bóliginde jel kúsheıip, jańbyr jaýady
NUR-SULTAN. QazAqparat - 22 maýsymda atmosferalyq aǵyndardyń ótýine baılanysty respýblıkanyń basym bóliginde jańbyr jaýady, jel kúsheıip, burshaq jaýýy yqtımal, dep habarlaıdy QazAqparat Qazgıdrometke silteme jasap.
Sondaı-aq, Qazaqstannyń soltústiginde túnde jáne tańerteń keı jerlerinde tuman kútiledi. Ońtústikte jáne batysta kún ashyq bolady.
Soltústik Qazaqstan, kúndiz Aqmola oblystarynyń keı jerlerinde jeldiń jyldamdyǵy 15-20 m/s jetedi, Soltústik Qazaqstan oblysynda daýyl kútiledi, túnde jáne tańerteń keı jerlerinde tuman túsedi.
Qostanaı, Shyǵys Qazaqstan, kúndiz Almaty, Jambyl oblysynyń keı jerlerinde jel 15-22 m/s kúsheıedi, Almaty, Shyǵys Qazaqstan oblysynyń keı jerlerinde kúndiz burshaq jaýýy yqtımal. Qaraǵandy, kúndiz Pavlodar oblysynyń keı jerlerinde jel 15-20 m/s kúsheıedi, daýyl turýy múmkin, Qaraǵandy oblysynyń keı jerlerinde burshaq kútiledi.
Atyraý, Aqtóbe oblysynyń keı jerlerinde, Mańǵystaý, Batys Qazaqstan oblystarynyń keı jerlerinde kúndiz aptap ystyq bolady.
Mańǵystaý, Atyraý, Batys Qazaqstan, Qyzylorda, Aqtóbe oblysynyń keı jerlerinde, Qostanaı, Túrkistan, Almaty oblystarynyń keı jerlerinde joǵary órt qaýpi saqtalady.
