22 maýsymda biz Uly Otan soǵysy bastalǵan qaıǵyly kúndi eske alamyz - Senat spıkeri Q.Mámı
ASTANA. 22 maýsym. QazAqparat - 22 maýsymda biz Uly Otan soǵysy bastalǵan qaıǵyly kúndi eske alamyz. Soǵys mıllıondaǵan adamdardyń ómirin qıdy.
Soǵystyń kesirinen aǵaıyny men týysynan aıyrylyp, qaıǵy-qasiretke ushyramaǵan otbasy joq deýge bolady. Sondyqtan da bul kún bizdiń jadymyzda máńgilik saqtalady, dep jazady QR Parlamenti Senatynyń Tóraǵasy Qaırat Mámı óziniń jeke paraǵynda.
«Otan soǵysy Keńester Odaǵynyń barlyq halyqtary úshin aýyr synaq boldy. Jeńis jolynda qurban bolǵandar sany óte kóp. Sondyqtan ótken soǵystyń sabaqtary, sondaı-aq onyń búkil adamzatqa tóndirgen qaýip-qaterinen saqtaný búgingi kúni de mán-maǵynasyn joıǵan joq. Uly Otan soǵysynda qaza bolǵan áskerlerdiń esimderi men erligin qalpyna keltirýge janqııarlyqpen eńbek etip kele jatqan ardagerler uıymdary men izdeýshiler qozǵalystarynyń ókilderine alǵysymdy aıtyp, eń izgi tilekterimdi jetkizgim keledi. Uly Otan soǵysynyń barlyq ardagerlerine zor densaýlyq, rýhanı sergektik, ıgilik pen uzaq ómir tileımin», - delingen onda.
