216 azamatqa «Bolashaq» halyqaralyq stıpendııasy taǵaıyndaldy
ASTANA. 21 jeltoqsan. QazAqparat /Marlan Jıembaı/ - Shetelde kadrlar daıarlaý jónindegi respýblıkalyq komıssııa 216 azamatqa «Bolashaq» halyqaralyq stıpendııasyn taǵaıyndady.
Bul týraly búgin Aqordada QR Memlekettik hatshysy Qanat Saýdabaevtyń tóraǵalyǵymen ótken atalǵan komıssııanyń otyrysynan keıin BAQ ókliderine suhbat bergen QR BǴM Strategııalyq josparlaý jáne aqparattyq tehnologııalar departamenti dırektorynyń orynbasary Aqerke Abylaıhan málim etti.
Onyń atap ótýinshe, komıssııa otyrysynda jalpy «Bolashaq» baǵdarlamasynyń aıasynda aǵymdaǵy jyly atqarylǵan jumystardyń qorytyndylary egjeı-tegjeıli qaralǵan. Sonymen qatar osy jyly túlekterdi jumysqa ornalastyrý máselesi de sóz bolyp, olardy jumysqa ornalastyrý boıynsha normatıvtik-quqyqtyq aktilerge engizilgen ózgerister týraly baıandalǵan.
«Búgingi respýblıkalyq komıssııanyń qorytyndysy boıynsha 216 azamatqa «Bolashaq» halyqaralyq stıpendııasy taǵaıyndaldy. Bul azamattardyń 56-sy sheteldik joǵary oqý oryndaryna óz betterimen túsken úmitker, al qalǵandary jalpy konkýrs aıasynda qatysyp otyr», - dedi ol.
Mınıstrlik aqparatyna sáıkes, aǵymdaǵy jyldyń 1 qyrkúıegi men 8 jeltoqsany aralyǵynda ótkizilgen konkýrstyq irikteýdiń 1 jáne 2 kezeńderiniń nátıjeleri boıynsha 389 azamat «Bolashaq» baǵdarlamasynan úmitti bolǵan. Olardyń 159-y Ulybrıtanııada, 91-i AQSh-ta, 34-i Reseıde, 19-y Germanııada oqýǵa qujat tapsyrǵan. Al qalǵan úmitkerler Frantsııa, Italııa, Avstralııa, Qytaı, Nıderlandy, Norvegııa, Chehıa, Kanada, Slovakııa, Avstrııa, Shveıtsarııa elderin tańdaǵan.
