21,2 mlrd teńgeniń negizsiz jumsalýyna jol berilmedi – Ashat Jumaǵalı Prezıdentke esep berdi

ASTANA. KAZINFORM – Memleket basshysy Cybaılas jemqorlyqqa qarsy is-qımyl agenttiginiń tóraǵasy Ashat Jumaǵalıdy qabyldady. Bul týraly Aqordanyń baspasóz qyzmeti habarlady. 

Prezıdent Agenttiktiń elimizde sybaılas jemqorlyqqa qarsy atqaryp jatqan jumysymen tanysty. Memleket basshysyna bıylǵy birinshi toqsandaǵy vedomstvo qyzmetiniń nátıjeleri men «Zań jáne tártip» tujyrymdamasyn iske asyrý jóninde baıandaldy. 

Ashat Jumaǵalıdyń aıtýynsha, jyl basynan beri sybaılas jemqorlyqqa qatysty 521 qylmys tirkelgen. Atap aıtqanda, 257 laýazymdy tulǵa áshkerelendi, olardyń 141-i – ártúrli deńgeıdegi basshylar. Sotqa 366 qylmystyq is jiberildi.

Prezıdentke bıyl memleket paıdasyna 15 mıllıard teńge ótelgeni týraly málimet berildi. 2022 jyldan bastap jalpy somasy 1,13 trıllıon teńge bolatyn aktıvter qaıtarylǵan. Memlekettik satyp alý men qarjynyń maqsatty paıdalanýyna monıtorıng júrgizý barysynda 21,2 mıllıard teńgeniń negizsiz jumsalýyna jol berilmedi.

Memleket basshysyna týrızm salasyndaǵy sybaılas jemqorlyq táýekelderine syrtqy taldaý júrgizilgeni, onyń nátıjesi boıynsha ýákiletti organǵa usynymdar engizilgeni jaıynda aıtyldy.

Agenttik tóraǵasy avtokólik joldary qurylysynda «aqshany boıaý» jobasyn iske asyrý jóninde aıtty.

Qasym-Jomart Toqaevqa «Zań jáne tártip», «Adal azamat» tujyrymdamalaryna sáıkes sybaılas jemqorlyqqa qarsy mádenıetti qalyptastyrý baǵytyndaǵy bastamalar tanystyryldy. Ártúrli formattaǵy 3 myńǵa jýyq is-shara ótkizilip, oǵan 450 myńnan astam azamat qatysty. «Sybaılas jemqorlyqqa qarsy volonterlik» jobasy iske asyrylyp jatyr. Agenttik elimizdiń jetekshi joǵary oqý oryndarynyń Akademııalyq adaldyq lıgasymen jumysty qolǵa aldy.

Prezıdentke halyqaralyq yntymaqtastyq, sonyń ishinde EYDU jáne Sybaılas jemqorlyqqa qarsy kúres jónindegi memleketter tobymen seriktestik jaıynda aqparat berildi. Agenttik Halyqaralyq sybaılas jemqorlyqqa qarsy organdar qaýymdastyǵymen berik baılanys ornatqan jáne bıylǵy aqpan aıynda atalǵan uıymnyń Atqarý komıteti quramyna kirdi.

Byltyr Transparency international sybaılas jemqorlyqty qabyldaý ındeksine saı atqarylǵan jumystardyń nátıjesinde Qazaqstan 40 balǵa ıe bolyp, 180 eldiń arasynda 88-orynǵa turaqtady.

Kezdesý sońynda Prezıdent elimizdegi sybaılas jemqorlyqqa qarsy is-qımyldardy odan ári jalǵastyrý, tamyr jaıǵan qylmystyq tizbektiń jolyn kesý jáne qoǵamda sybaılas jemqorlyqqa qarsy mádenıet qalyptastyrý jóninde birqatar tapsyrma berdi.