210 mlrd teńge: 1,6 mln bala mektepte tegin tamaqpen qamtyldy
ASTANA. KAZINFORM — Qazaqstanda 1-4 synyptardaǵy 1,4 mln oqýshy jáne áleýmettik osal sanattaǵy 5-11 synyptardyń 230 myńnan astam oqýshysy mekteptegi tegin tamaqpen qamtyldy. Bul maqsatqa 2026 jyly 210 mlrd teńge qarastyrylǵan. Bul týraly Úkimette ótken keńeste aıtyldy.
Balalarǵa arnalǵan qoldanystaǵy áleýmettik kepildikter týraly oqý-aǵartý mınıstri Juldyz Súleımenova baıandady.
Ashyqtyqty arttyrý úshin tamaqtaný esebi «Áleýmettik ámııan» júıesimen biriktirilgen: avtomattandyrylǵan júıe ár oqýshynyń tamaqtaný faktisin, kúnin jáne ýaqytyn tirkeıdi. Oqý-aǵartý mınıstrliginiń málimetinshe, ekologııalyq taqyryp jaratylystaný, geografııa, bıologııa, hımııa, fızıka jáne tehnologııa baǵdarlamalaryna biriktirilgen.
Mektepterde 4 myńnan astam «Jasyl klýb» birlestigi jumys isteıdi, olarǵa 125 myńnan astam bala baryp júr. ProEko respýblıkalyq ekologııalyq jobalar konkýrsyna 38,7 myń oqýshy qatysty.
Osy jyldyń sońyna deıin bilim berý uıymdarynda ekologııalyq aǵartýdyń biryńǵaı standartyn qabyldaý josparlanyp otyr. Ony engizýdiń is júzindegi tetigi «Jasyl mektep» ulttyq modeli bolmaq. Qazir model 85 mektepte synalýda, bolashaqta ony 1 myń mektepke deıin keńinen taraty josparlanǵan.
Úkimet jetekshisi oqý oryndarynda ekologııalyq aǵartý boıynsha júıeli sharalar júrgizýdiń mańyzdylyǵyn atap ótti. Oqý-aǵartý, ǵylym jáne joǵary bilim mınıstrlikterine bul jumysty oqýshylar men stýdentter arasynda kúsheıtý tapsyryldy.
Buǵan deıin Prezıdent oqýshylardy ystyq tamaqpen qamtý týraly «Gúldengen sotsıalızm» tusynda da mundaı qamqorlyq bolmaǵan degen edi.
