21 jastaǵy qostanaılyqtyń ólimi: Eńbek ınspektsııasy kinálilerdi atady
QOSTANAI. QazAqparat - Qostanaı oblysynda 21 jastaǵy jumysshynyń shuńqyrǵa qulap ketip, qaza bolýyna baılanysty qurylǵan arnaıy komıssııa óz jumysyn aıaqtady, dep habarlaıdy QazAqparat oblystyq Eńbek ınspektsııasy basqarmasyna silteme jasap.
Adam múrdesiniń tabylǵany týraly aqparat 17 mamyr kúni TJD-nyń kezekshi-dıspetcherlik bólimine túsken. Vedomstvodan málim etkendeı, jumysshylar toby «ıÝbıleınyı» shaǵyn aýdanynda qurylys-montajdaý jumystaryn júrgizý úshin kelgen. Qaza bolǵan slesar-montajdaýshy ózgelermen birge qazylǵan transheıalarǵa polıetılen qubyrlaryn tasyp júrgen.
«Saǵat 16:00-de jumysshy jumys aýmaǵynan alystap, transheıanyń 25-30 metr jerdegi jıegine jaqyndaǵan. Sol kezde transheıanyń sheti opyrylyp, jumysshy qulap ketken. Muny kórgen kásiporynnyń ózge qyzmetkerleri ol jerdi qaza bastaǵan. 10-15 mınýttan soń jumysshyny taýyp, jedel-járdem men polıtsııa shaqyrǵan», - dedi oblystyq Eńbek ınspektsııasy basqarmasynan.
Buǵan baılanysty oblystyq Eńbek ınspektsııasy basqarmasy arnaıy komıssııa qurǵan bolatyn.
Arnaıy zertteý nátıjesi boıynsha qaıǵyly oqıǵa jábirlenýshiniń abaısyzdyǵynan jáne jumys óndirisin durys uıymdastyrmaýdan bolǵany anyqtaldy. Oqıǵanyń mán-jaıyn anyqtaı kele komıssııa jumys berýshi men jumysshynyń kinálaryn 50 de 50 dep tapty.
