21 jasqa tolmaǵandarǵa energetıkalyq sýsyn satqandarǵa jaýapkershilik engizilmek
ASTANA. KAZINFORM — 21 jasqa tolmaǵandarǵa energetıkalyq sýsyn satqandarǵa jaýapkershilik engizilmek. Bul týraly Májilis depýtattarynyń saýalyna Premer-mınıstrdiń orynbasary Serik Jumanǵarınniń jaýabynda aıtylǵan.
— Sońǵy jyldary elde salaýatty ómir salty mádenıetin qalyptastyrý jáne ınfektsııalyq emes aýrýlardyń aldyn alý boıynsha keshendi sharalar júzege asyrylyp jatyr. Densaýlyq saqtaý mınıstrligi durys tamaqtaný, jastar densaýlyq ortalyqtaryn damytý, temeki men alkogol tutynýdy azaıtý, dene belsendiligin arttyrý jáne salaýatty ómir saltyn aqparattyq túsindirý jumystaryn júrgizý sııaqty is-sharalardy qamtıtyn jol kartalaryn iske asyryp jatyr, — dedi vıtse-premer.
Osy oraıda ol birqatar mańyzdy zańnamalyq bastama qabyldanǵanyn atap ótedi.
— Atap aıtqanda, veıpterdi ákelýge jáne satýǵa, 21 jasqa deıingi tulǵalarǵa energetıkalyq sýsyndardy satýǵa tyıym salyndy. Temeki men alkogol tutynýdy azaıtý jónindegi sharalar bekitildi. Alǵash ret energetıkalyq sýsyndarǵa aktsızder engiziledi. Mektep taǵamy standarttary qaıta qaraldy. Qazirgi ýaqytta 21 jasqa deıingi tulǵalarǵa energetıkalyq sýsyndardy satý normalaryn buzǵany úshin ákimshilik jaýapkershilik engizý sharalary qarastyrylyp jatyr, — dedi Serik Jumanǵarın.
Aıta keteıik, 2025 jyldyń qańtarynan bastap «Halyq densaýlyǵy jáne densaýlyq saqtaý júıesi týraly» Kodekske engizilgen túzetýler kúshine endi. Soǵan sáıkes, energetıkalyq sýsyndardy 21 jasqa tolmaǵan azamattarǵa satýǵa qatań tyıym salynady.