21 jasqa tolmaǵandardy qumar oıynǵa tartqandar jaýapkershilikke tartylýy múmkin

ASTANA. QazAqparat – 21 jasqa tolmaǵan adamdardy qumar oıynǵa tartqandar ákimshilik jaýapkershilikke tartylýy múmkin. Premer-Mınıstr Álıhan Smaıylov Májilis depýtattarynyń saýalyna joldaǵan jaýabynda osyndaı málimet keltirdi, dep habarlaıdy QazAqparat tilshisi.

«Parlament Májilisi VII shaqyrylymynyń depýtattary (E.Beısenbaev, D.Zakıeva, E.Jańbyrshın, M.Ahmetov) «Qazaqstan Respýblıkasynyń keıbir zańnamalyq aktilerine oıyn bıznesi, lotereıa jáne lotereıa qyzmeti máseleleri boıynsha ózgerister men tolyqtyrýlar engizý týraly» jáne «Ákimshilik quqyq buzý týraly kodekske ózgerister men tolyqtyrýlar engizý týraly» eki zań jobasyna bastamashylyq jasady. Onyń sheńberinde bankterge jáne tólem júıelerine oıyn bıznesin sheteldik uıymdastyrýshylardyń zańsyz qyzmeti kezinde qarjy operatsııalaryn júrgizýge tyıym salýdy belgileý, buqaralyq aqparat quraldarynda býkmekerlik keńseler men totalızatorlardyń jarnamasyn shekteý, aqparattyq-telekommýnıkatsııalyq jelilerdi, onyń ishinde ınternet jelisin, baılanys quraldary men lotereıa termınaldaryn paıdalana otyryp, lotereıa bıletin taratýǵa tyıym salý, 21 jasqa deıingi adamdardy qumar oıynǵa tartý jáne bás tigý úshin zańdy tulǵalardyń ákimshilik jaýapkershiligin belgileý boıynsha jáne basqa túzetýler kózdelgen», - dep jazady Úkimet basshysy.

Onyń aıtýynsha, qazirgi tańda atalǵan zań jobalaryna ázirlengen Úkimet qorytyndylarynyń jobalaryn Mádenıet jáne sport mınıstrligi belgilengen tártippen múddeli memlekettik organdarmen birlesip pysyqtap jatyr.

«Osy máselelerdiń mańyzyn eskere otyryp, ony sheshý baǵytynda Úkimetpen qatar qoǵam ókilderiniń jáne depýtattyq korpýs atsalysýy qajet dep sanaımyz. Úkimet sizdermen birge zań jobalary sheńberinde oıynǵa táýeldilikke qarsy turý boıynsha naqty usynystardy talqylaýǵa daıyn ekenin bildiredi», - delingen jaýapta.