21 jasar boıjetken «Petropavl arýy-2015» baıqaýynyń jeńimpazy atandy (FOTO)
PETROPAVL. QazAqparat - Soltústik Qazaqstan oblysynyń oblys ortalyǵynda 10 jyldan soń «Petropavl arýy-2015» baıqaýy qaıta jańǵyrdy. Arý ataný úshin 15 boıjetken baq synasty.
Ony uıymdastyrýshy Natalıa Chorbanyń aıtýynsha, baıqaýǵa 16 jastan asqan qyzdar qatystyrylǵan. Kastıngte 40 adam baq talastyrǵan.
Qyzdar synynyń qorytyndysynda «Petropavl arýy-2015» baıqaýynyń tájin M.Qozybaev atyndaǵy Soltústik Qazaqstan ýnıversıtetiniń 4 kýrs stýdenti 21 jasar Alına Hlevova ıelendi. Jeńimpaz boıjetken respýblıkalyq baıqaýda óńir namysyn qorǵaıtyn bolady.
«Bul baıqaýda jeńiske jetkenimen asa qýanyshtymyn. Endi ózime artylǵan úmitti aqtaýǵa, respýblıkalyq baıqaýǵa tyńǵylyqty daıyndalýǵa tyrysamyn. Men bımen aınalysamyn, belsendi ómir saltyn ustanamyn», - deıdi Alına shattanǵan sezimin jasyra almaı. Baıqaý qatysýshylarynyń barlyǵy kóptegen demeýshiler tarapynan syılyqtarmen marapattaldy, al jeńimpazǵa 100 myń teńge kóleminde syıaqy berildi.
