21 shildede Qazaqstannyń orman qory aýmaǵynda 19 órt sóndirildi
ASTANA. KAZINFORM – 21 shildede Qazaqstannyń memlekettik orman qory aýmaǵynda tirkelgen 19 orman órti tolyq sóndirildi.
Orman sharýashylyǵy jáne janýarlar dúnıesi komıtetiniń málimetinshe, órtterdiń tórteýi Shyǵys Qazaqstan oblysynda, bireýi «Kókshetaý» memlekettik ulttyq tabıǵı parkinde, bireýi «Ertis ormany» memlekettik orman tabıǵı rezervatynda jáne 13-i «Semeı ormany» memlekettik orman tabıǵı rezervatynda bolǵan.
– Órt oshaqtary erte anyqtaý júıesi jáne «Qazavıaormanqorǵaý» respýblıkalyq memlekettik qazynalyq kásipornynyń áýe patrýldeýi arqyly anyqtalyp, orman qyzmetkerlerine jedel habar berildi. Órt tirkelgen sátten bastap memlekettik orman kúzeti men «Qazavıaormanqorǵaý» áýe órt sóndirý desanttary dereý jumyldyrylyp, órtti oqshaýlaý jáne sóndirý jumystary júrgizildi, – delingen habarlamada.
Vedomstvonyń málimetinshe, naızaǵaı saldarynan tutanǵan orman órtteriniń keń aýmaqqa taralýyna jol berilmeı, barlyǵy qysqa merzimde tolyq sóndirilgen.
Qazirgi ýaqytta órt qaýipti kezeńge baılanysty óńirlerde memlekettik orman kúzeti men «Qazavıaormanqorǵaý» kúshteri kúsheıtilgen rejımde jumys istep jatyr. Áýe patrýldeýi men orman alqaptaryn baqylaý úzdiksiz júrgizilýde.
Orman sharýashylyǵy jáne janýarlar dúnıesi komıteti azamattardy aptap ystyq kezeńinde tabıǵat aıasynda órt qaýipsizdigi talaptaryn qatań saqtaýǵa shaqyrdy.
Aıta keteıik, Qazaqstanda bıyl 536 orman órti tirkeldi.
