21 sáýir – Qurlyq áskerleriniń qurylǵan kúni
ASTANA. KAZINFORM – Qazaqstan Qarýly kúshterindegi quramy jaǵynan eń sany kóp Qurlyq áskerleri 1993 jylǵy 21 sáýirde quryldy.
Qurlyq áskerleriniń búgingi áleýeti elimizdiń aýmaqtyq tutastyǵy men egemendigin qorǵaýǵa, memlekettik jáne áskerı nysandardy kúzetýge, zańsyz qarýly toptarmen kúresýge, sondaı-aq halyqaralyq sharttar aıasyndaǵy mindetterdi oryndaýǵa tolyq múmkindik beredi.
Qurlyq áskerleriniń beıbit ýaqytta atqaratyn mindetteriniń de aýqymy keń. Olar jaýyngerlik ázirlikti saqtaý, oqý-jattyǵýlar ótkizý, jeke quramdy daıarlaýdan bólek, tótenshe jaǵdaılardyń saldaryn joıýǵa da qatysady.
Onyń quramyna «Astana», «Shyǵys», «Batys», «Ońtústik» óńirlik qolbasshylyqtary, tyldyq jáne tehnıkalyq qamtamasyz etý quramalary men bólimderi, Qurlyq áskerleriniń áskerı ınstıtýty, Shoqan Ýálıhanov atyndaǵy Qorǵanys mınıstrliginiń áskerı kolledji kiredi.
Qolbasshylyqtyń negizgi kúsh-jigeri turaqty jaýyngerlik daıyndyqty saqtaýǵa, áskerı basqarý organdary men áskerlerdi jaýyngerlik maqsatqa sáıkes mindetterdi sheshýge daıyndaýǵa baǵyttalǵan.
Qazirgi zamanǵy qarýly kúres sıpatynyń ózgerýine baılanysty áskerlerde jaýyngerlik daıyndyq baǵdarlamalary qaıta qaraldy. Oqý-jattyǵýlar barysynda jańa ádis-tásilder synaqtan ótýde. Qarý-jaraq parki jańartylyp, áskerı ınfraqurylym damytylýda, oqý-jattyǵýlardyń sapasy men sany jyl saıyn artyp keledi.
Mamandyq boıynsha teorııalyq jáne praktıkalyq sabaqtardy sapaly ótkizý úshin shamamen 20 000 áskerı qyzmetshi daıarlandy. Kásibı nusqaýshylardy tarta otyryp, ofıtserler men serjanttar qatarynan 3000-nan astam adam daıyndyqtan ótti.
2026 jylǵy qysqy oqý kezeńinde Qurlyq áskerlerinde jaýyngerlik daıarlyq boıynsha 17 myńnan astam is-shara ótkizildi. Onyń 12 myńnan astamy praktıkalyq atystardy qamtıdy. Budan bólek tankter men jaıaý ásker jaýyngerlik mashınasynyń qarý-jaraǵynan 5 myńnan asa atys júrgizildi.
Bólimshelerdi úılestirýdiń qorytyndy kezeńinde 900-den astam jaýyngerlik atys pen 200-den asa taktıkalyq oqý-jattyǵý ótkizildi. Sonymen qatar bólimsheler 300-den astam dalalyq joryq jasady.
Ofıtserlik quramnyń biliktiligin arttyrý maqsatynda «Taktık», «Abyroı», «Zymyran» kýrstarynyń daıarlyǵy jolǵa qoıyldy. Onda kishi komandalyq býynnyń kásibı deńgeıi turaqty túrde jetildirilip otyrady.
Qurlyq áskerlerinde ushqyshsyz ushý apparaty operatorlaryn daıarlaýǵa erekshe nazar aýdarylýda. Áskerı bólimder men oqý ortalyqtarynda drondardy jınaý, jóndeý jáne qaıta iske qosýǵa arnalǵan sheberhanalar jumys isteıdi.
Áskerler qarý-jaraq pen áskerı tehnıkanyń, joǵary dáldiktegi qarýlardyń, baılanys, barlaý jáne avtomattandyrylǵan basqarý júıeleriniń qazirgi zamanǵy úlgilerimen jabdyqtalǵan.
Keıingi jyldary Qurlyq áskerlerindegi jaýyngerlik daıarlyqtyń qarqyny birneshe ese artty. Jeke quram ártúrli oqý-jattyǵýlarǵa, onyń ishinde halyqaralyq aýqymdaǵy jattyǵýlarǵa turaqty qatysyp, ózderiniń tájirıbesi men dalalyq daǵdylaryn jetildirip keledi. Atap aıtqanda, olardyń qatarynda «Batyl toıtarys», «Shyǵys», «Aıbalta», «Kókjal», «Beket» jáne basqa oqý-jattyǵýlar bar.
Búginde Joǵary jaýyngerlik qabiletti Qurlyq áskerleri egemendikti, eldiń aýmaqtyq tutastyǵy men azamattardyń beıbit ómirin qorǵaýǵa daıyn.
Aıta keteıik, buǵan deıin Qorǵanys mınıstrligi áskerı qyzmetshilerdi negizinen qandaı mamandyqtarǵa baýlıtyny habarlandy.