21 myńnan astam mańǵystaýlyq Táýelsizdiktiń 25 jyldyǵyna syıaqy alady

ASTANA. QazAqparat - QR Táýelsizdiginiń 25 jyldyǵyna oraı, Mańǵystaý oblysynyń barlyq sanattaǵy múgedekterine bes AEK (10 605 teńge) tólenedi.

 Dál osy maqsatta bıýdjetten 230 mıllıon teńge bólý qarastyrylǵan. Bul týraly Mańǵystaý oblysy jumyspen qamtýdy úılestirý jáne áleýmettik baǵdarlamalar basqarmasynyń basshysy Gúlmıra Qalmuratova habarlady, dep jazady lada.kz.

Mańǵystaý oblysynda 21 myńnan astam barlyq sanattaǵy múgedekter tólemaqyǵa ıe bolady.

«Ekinshi deńgeıli bankterdiń karta-shottaryna aqsha aýdarý bastaldy. Kómek alatyndardyń qatarynda respýblıkalyq jáne oblystyq mańyzy bar zeınetkerler, UOS ardagerleri jáne múgedek ınternatsıonalıst-jaýyngerler de bar», - dedi G.Qalmuratova.

Mańǵystaý oblysy jumyspen qamtýdy úılestirý jáne áleýmettik baǵdarlamalar basqarmasynyń basshysy QR Táýelsizdigine oraı oblysta beriletin tólemniń azdyǵyna qaramastan, bir rettik kómektiń jyl saıyn bes merekege oraı turaqty berilip kele jatqanyn atap ótti. Almatyda, mereke qarsańynda ár adamǵa 50 myń teńgeden berildi.

«Tólemaqy mólsheri aýdandar men qalalarda birdeı, 2017 jylǵa da bekitilgen. Bıýdjette qosymsha materıaldyq kómek úshin bir jarym mıllıard teńge qarastyrylǵan. Bul qarjy áleýmettik paketti quraıdy jáne bul qarajat muqtaj jandarǵa kómek bolady dep úmittenemiz», - dedi G.Qalmuratova.