21 myń lıtr benzındi shekara asyrmaq bolǵan Reseı azamaty ustaldy

NUR-SULTAN. QazAqparat - Oral shekara jasaǵynyń «Shaǵan-avto» bólimshesinde 21 472 lıtr benzındi shekara asyrmaq bolǵan Reseı azamaty ustaldy, dep habarlaıdy QazAqparat Ulttyq qaýipsizdik komıtetiniń shekara qyzmetine silteme jasap.

«Shekarashylar Batys Qazaqstan oblysy boıynsha memlekettik kiris departamentiniń qyzmetkerlerimen birlesip, 4 mıllıon 750 myń teńgeniń benzınin shekara asyrmaq bolǵan Reseı azamatyn ustady. Ustalǵan azamat jalpy kólemi 21 472 lıtr bolatyn «AI-92» benzınin Memlekettik shekaradan «NEFRAS-S30/230» jýǵysh zaty retinde alyp shyqpaqshy bolǵan» delingen habarlamada.

Aıta keteıik, osy kúni atalǵan jasaqtyń «Syrym-avto» bólimshesinde 1974 jylǵy Qazaqstan azamaty elimizden shyǵarýǵa tyıym salynǵan zattar tizimindegi, jalpy salmaǵy 20 tonna, buryn paıdalanylǵan temir qubyrlardy Reseıge alyp shyqpaqshy boldy. Quny - 590 000 teńge bolatyn zańsyz júk Báıterek aýdandyq memlekettik kirister departamentine tapsyryldy.

Sondaı-aq, osy jasaqqa qarasty «Aqsaı» shekara zastavasynyń shekarashylary Batys Qazaqstan oblysy boıynsha orman jáne janýarlar álemin qorǵaý sharýashylyǵynyń mamanymen birge katermen Jaıyq ózeniniń jaǵalaýyn sholyp júrip, 400 metr kólemindegi aý taýyp aldy. Aýǵa shyrmatylyp qalǵan qymbat baǵaly balyqtar tirideı qutqaryldy.