21 myń qadaǵalaý aktisin qaraý nátıjesinde 353 myń azamattyń konstıtýtsııalyq quqyqtary qorǵaldy -Bas prokýratýra
ASTANA. 15 shilde. QazAqparat. Bas Prokýror Ashat Daýylbaevtyń tóraǵalyq etýimen Qazaqstan Respýblıkasy Bas prokýratýrasynyń keńeıtilgen alqa májilisi bolyp ótti. Májiliste aǵymdaǵy jyldyń birinshi jartyjyldyǵynyń qorytyndysy talqylanyp, aldaǵy kezeńge arnalǵan basymdyqtar aıqyndaldy,
dep habarlaıdy Bas prokýratýranyń baspasóz qyzmeti.
Alqanyń jumysyna oblys prokýrorlary jáne olarǵa teńestirilgen prokýrorlar, beınekonferentsııalyq baılanys arqyly oblystyq jáne aýdandyq prokýratýralardyń qyzmetkerleri qatysty.
Bas Prokýror atap ótkendeı, aǵymdaǵy jyly prokýratýra organdary quqyq qorǵaý organdary qyzmetin odan ári jetildirý jáne tıimdiligin arttyrýǵa baǵyttalǵan Memleket basshysynyń tapsyrmalaryn júzege asyrý baǵytynda jumys istedi.
Halyqtyń áleýmettik az qamtylǵan bóligi úshin erekshe mańyzdy bolyp tabylatyn prokýratýra organdarynyń quqyq qorǵaýshylyq áleýetin júzege asyrýǵa, azamattardyń konstıtýtsııalyq quqyqtaryn jáne kásipkerlikti qorǵaýǵa asa nazar aýdaryldy. 255 myńnan astam zańdylyqty buzý tirkeldi. 21 myń qadaǵalaý aktisin qaraý nátıjesinde 353 myń azamattyń konstıtýtsııalyq quqyqtary qorǵaldy. 23 mıllıard teńge shyǵynnyń orny toltyryldy, onyń ishinde 14 mıllıard teńge memlekettik bıýdjetke qaıtaryldy.
Azamattardyń zeınetaqy jınaqtarynyń saqtalýyn qamtamasyz etý maqsatynda jáne jeti mıllıon salymshynyń múddelerin qorǵaý úshin Úkimetke zeınetaqylyq zańnamany jetildirý jáne salymshylardyń múddelerine saı kelmeıtin kelisimder jasaǵan jaǵdaıda zeınetaqy qorlarynyń jaýapkershiligin kúsheıtý boıynsha sharalar qabyldaý usynyldy.
Azamattardyń eńbek quqyqtaryn qorǵaý salasyndaǵy júıeli jumys burynǵydaı basym baǵyttardyń biri bolyp qalyp otyr. Prokýrorlyq yqpal etý sharalarymen respýblıka kóleminde jalpy somasy 2,2 mlrd. teńge jalaqy qaryzdary óteldi.
Prokýrorlardyń aralasýynan keıin aýylsharýashylyǵy ónimderin ımporttaýshylarǵa ákimshilik kedergiler joıyldy. Endi olar karantındik ruhsatty kútip aptalap shekarada turmaıdy.
Kásipkerlerge quqyqtyq kómek kórsetýge baǵyttalǵan «Bıznes tiregi» jobasynyń múmkindikteri tıimdi paıdalanylýda.
Memleket basshysynyń quqyq qorǵaý qyzmetiniń tıimdiligin arttyrýǵa baǵyttalǵan jańa talaptaryna saı Bas prokýratýra qylmystar men oqıǵalar týraly aryz-shaǵymdardy tirkeý jáne qaraý protsesine ınnovatsııalyq tehnologııalardy engizý jumystaryn júzege asyrýda, osynyń nátıjesinde árbir aryz ben habarlamanyń qaralý barysyn shynaıy ýaqyt rejıminde monıtorıng jasap otyrýǵa múmkindik ashyldy.
Alqa jumysynyń qorytyndysy boıynsha Bas Prokýror uıymdasqan qylmyspen, ekstremızm jáne terrorızmmen, sybaılas jemqorlyqpen jáne kóleńkeli ekonomıkamen kúrestegi prokýratýra organdarynyń úılestirýshilik rólin kúsheıtý boıynsha birqatar tapsyrmalar berdi. Azamattardyń, kásipkerlik ókilderiniń, úleskerlik qurylysqa qatysýshylardyń quqyqtary men zańdy múddelerin qorǵaýdy qamtamasyz etýge erekshe nazar aýdaryldy. Sondaı-aq Memleket basshysynyń tapsyrmalaryn sapaly jáne ýaqtyly oryndaý boıynsha ózge de mańyzdy mindetterdi aıqyndady.
