2,1 mln qazaqstandyq dáriger kómegin qashyqtan aldy: onyń 39%-y – aýyl turǵyndary
ASTANA. KAZINFORM — Qazaqstanda telemedıtsınaǵa júginetinder sany artyp keledi. 2026 jyldyń basynan beri 2,1 mln-nan astam adam qashyqtan medıtsınalyq kómek alǵan, olardyń 39%-y – aýyl turǵyndary. Bul týraly Densaýlyq saqtaý mınıstrliginiń baspasóz qyzmeti málim etti.
Telemedıtsına aýyldyq jerlerdegi beıindi mamandar tapshylyǵyn óteýdiń tásilderiniń birine aınalyp otyr.
Jyl basynan beri 1 mln-nan astam telekonsýltatsııa ótkizildi, 2,1 mln-nan astam adamǵa qashyqtan medıtsınalyq qyzmet kórsetildi, olardyń 39%-y — aýyl turǵyndary. 709 medıtsınalyq uıymnyń mamandary qashyqtan medıtsınalyq kómek kórsetýde.
Endi shalǵaıdaǵy aýyl turǵyny beıindi mamannyń konsýltatsııasyn alý úshin ǵana oblys ortalyǵyna barýǵa májbúr emes.
Patsıenttiń marshrýty myna qaǵıdat boıynsha uıymdastyrylǵan:
- aýyldyq feldsherlik-akýsherlik pýnkt nemese ambýlatorııa
- úılestirý ortalyǵy
- mamannyń telekonsýltatsııasy
- sheshim qabyldaý
- qashyqtan baqylaý.
Búginde aýyldyq densaýlyq saqtaý salasynda 1 122 medıtsına qyzmetkeri tapshy. Degenmen telemedıtsınalyq tehnologııalar mamandardyń jetispeýshiligin ishinara tolyqtyrýǵa múmkindik beredi.
— Qashyqtan elektrokardıografııa, jedel taldaýlar, sondaı-aq tsıfrlyq medıtsınalyq qurylǵylardyń kómegimen júrgiziletin zertteýler qoljetimdi. Aldaǵy ýaqytta qyzmet túrleri ÝDZ, flıýorografııa, rentgen jáne genetık konsýltatsııasy esebinen keńeıtiledi, — delingen habarlamada.
Tsıfrlyq kontýrǵa qylmystyq-atqarý júıesiniń 72 mekemesi de qosylǵan. Qamtý kórsetkishi shamamen 12 myń sottalǵan adamdy quraıdy.
Mektep medıtsınasyn tsıfrlyq súıemeldeýmen 6 936 mektep jáne 3,67 mln bala qamtylǵan.
Tsıfrlandyrýdyń taǵy bir nátıjesi — sanıtarııalyq avıatsııanyń jumysy. Ushyp shyǵýǵa ótinimdi rásimdeý ýaqyty 180 mınýttan 30 mınýtqa deıin qysqardy.
Osylaısha, densaýlyq saqtaýdy tsıfrlandyrý medıtsınalyq kómekti júıeniń ortalyǵynan birtindep tikeleı adamǵa — aýylǵa, mektepke, tipti dárigerge fızıkalyq qoljetimdilik shekteýli jerlerge jaqyndata túsýde.
Aıta keteıik, MÁMS júıesinde qarjylyq baqylaýdyń jańa modeli engizildi.
