21 myńnan astam jas azamat armııa qataryn tolyqtyrady
ALMATY. KAZINFORM — 30 maýsymǵa deıin 18-27 jas aralyǵyndaǵy 21 myńnan astam azamat Qarýly kúshterdiń, basqa da áskerler men áskerı quralymdardyń qataryna shaqyrylady.
Memleket basshysy «Áskerı qyzmettiń belgilengen merzimin ótkergen merzimdi áskerı qyzmettegi áskerı qyzmetshilerdi zapasqa shyǵarý jáne Qazaqstan Respýblıkasynyń azamattaryn 2026 jyldyń naýryz-maýsymynda jáne qyrkúıek-jeltoqsanynda merzimdi áskerı qyzmetke kezekti shaqyrý týraly» Jarlyqqa qol qoıdy.
Prezıdent Jarlyǵyna sáıkes, 17 naýryzdan bastap qalalyq jáne aýdandyq shaqyrý komıssııalary ákimderdiń orynbasarlarynyń tóraǵalyǵymen azamattardy merzimdi áskerı qyzmetke shaqyrýdy bastady.
– 30 maýsymǵa deıin 18-27 jas aralyǵyndaǵy 21 myńnan astam azamatty Qarýly kúshterdiń, basqa da áskerler men áskerı quralymdardyń qataryna shaqyrý josparlanyp otyr. Onyń ishinde 11 myńnan astam adam Qarýly kúshterge, 7 myńnan astam adam ІІM Ulttyq ulanyna, 2 myńǵa jýyq adam UQK Shekara qyzmetine, 400-ge jýyq adam Tótenshe jaǵdaılar mınıstrligine, 300 adam Memlekettik kúzet qyzmetine shaqyrylady, – dep atap ótti QR Qarýly kúshteri Bas shtaby Uıymdastyrý-jumyldyrý jumystary departamentiniń bastyǵy general-maıor Almas Isabekov.
Ol sondaı-aq azamattarǵa shaqyrý SMS-habarlama jáne eGov portalyndaǵy habarlandyrýlar arqyly keminde úsh kún buryn jiberiletinin eske saldy. Mundaı habarlamalar resmı shaqyrý bolyp esepteledi. Shaqyrtý alǵan azamat jergilikti áskerı basqarý organyna nemese shaqyrý pýnktine kelýge mindetti.
Qorǵanys mınıstrligi áskerı esepke alý protsesin avtomattandyryp, «Smart voenkomat» jobasyn júzege asyrýda. Bul júıe shaqyrylýshylar men áskerı mindettilerdiń jeke esebin júrgizedi, azamattar turǵylyqty jerin ózgertken kezde avtomatty túrde áskerı esepke qoıady, 17 jastaǵy jasóspirimderdi áskerı esepke tirkeýdi, sondaı-aq shaqyrýdy keıinge qaldyrý nemese odan bosatýdy avtomatty túrde rásimdeýdi qamtamasyz etedi.
Osylaısha, 2025 jyly 457 myńnan astam adamǵa keıinge qaldyrý berildi. Áskerge shaqyrý týraly buıryqtar elektrondyq formatta resimdeletinin atap ótý kerek. Bul áskerı qyzmetshilerge nesıelik demalys berý úshin málimetterdi kredıttik bıýrolarǵa avtomatty túrde jiberýge múmkindik beredi.
Sonymen qatar, shaqyrylýshylardy medıtsınalyq kýálandyrý kezinde qoldanylatyn «E-Medosmotr» medıtsınalyq júıesine ıntegratsııa engizildi. Qazirgi ýaqytta tsıfrlyq medıtsınalyq tekserý Astana, Shymkent qalalarynda, Almaty, Batys Qazaqstan jáne Jetisý oblystarynda keńinen qoldanylady. Bul rette 2025 jyly 17 myńnan astam shaqyrylýshy medıtsınalyq kýálandyrýdan tsıfrlyq formatta ótkenin atap ótý kerek.
Merzimdi áskerı qyzmet ótkerip júrgen azamattarǵa memleket tarapynan birqatar qoldaý sharalary qarastyrylǵan. Atap aıtqanda, olarǵa nesıelik demalystar beriledi, sondaı-aq UBT nátıjelerin esepke almaı, joǵary oqý oryndaryna memlekettik bilim berý granttarymen túsý múmkindigi beriledi.
– 2023 jyldan beri 9 myńnan astam sarbaz UBT tapsyrmaı, joǵary oqý oryndaryna tústi. Tek 2025 jyldyń ózinde bul múmkindikti 3 300 áskerı qyzmetshi paıdalandy, – dep atap ótti general-maıor Almas Isabekov.
20 myńnan astam áskerı qyzmetshige negizgi qaryz ben syıaqy boıynsha shamamen 8,8 mlrd teńge kóleminde nesıelik demalys berildi. Sonymen qatar, qyzmet barysynda sarbazdar Qarýly kúshterdiń túrleri boıynsha kishi mamandar daıarlaıtyn oqý ortalyqtarynda jumysshy mamandyqtaryn meńgere alady.
Budan bólek general-maıor Almas Isabekov dálelsiz sebeptermen jergilikti áskerı basqarý organdaryna kelmeý Qazaqstan Respýblıkasynyń zańnamasynda qarastyrylǵan jaýapkershilikke ákeletinin atap ótti. Ondaı jaǵdaıda azamatqa ákimshilik sharalar qoldanylýy múmkin. Al shaqyrýdan jaltarǵan jaǵdaıda qylmystyq zańnama normalaryna sáıkes jaýapkershilik qarastyrylǵan.
Aıta ketelik Qazaqstanda qorǵanys salasyna arnalǵan ınnovatsııalyq IT alańy iske qosyldy.
