21 qazannan bastap Qonaev – Taldyqorǵan avtojolynda ortasha jyldamdyq baqylanady
ASTANA. KAZINFORM — Bıyl 21 qazannan bastap Qonaev – Taldyqorǵan avtojolynda kólikterdiń ortasha jyldamdyǵyn baqylaý júıesi iske qosylady. Osylaısha respýblıkalyq joldarda ortasha jyldamdyqty asyrý derekteri tirkeletin bólikterdiń sany 16-ǵa jetedi.
«QazAvtoJol» UK» AQ jol qozǵalysy qaýipsizdigin arttyrý maqsatynda jyldamdyqty avtomatty túrde baqylaý júıesin kezeń-kezeńimen keńeıtip keletinin málimdedi. Endi Almaty jáne Jetisý oblystaryn baılanystyratyn Qonaev – Taldyqorǵan baǵytynda da júrgizýshilerdiń belgilengen jyldamdyqty saqtaýyna baqylaý júrgiziledi.
Jol boıyndaǵy kameralar avtokóliktiń baqylaý arkalarynan ótken ýaqytyn tirkeıdi. Osy málimetter men eki arkanyń araqashyqtyǵy negizinde kóliktiń ortasha jyldamdyǵy esepteledi.
Sondyqtan kameraǵa jaqyndaǵanda ǵana jyldamdyqty tómendetý ereje buzýshylyqty tirkeýden qutqarmaıdy. Eger júrgizýshi baqylaýdaǵy jol bóliginde ruqsat etilgen ortasha jyldamdyqtan assa, bul derek avtomatty túrde tirkeledi.
2026 jyldyń basynan beri respýblıkalyq avtojoldarda ortasha jyldamdyqty asyrýdyń 550 myń, al kamera ornatylǵan núktelerde jyldamdyqty asyrýdyń 163,5 myń deregi anyqtaldy. Jalpy jyldamdyqty asyrýǵa qatysty 713 myńnan astam quqyqbuzýshylyq tirkelgen.
Eske salaıyq, respýblıkalyq avtojoldarda ortasha jyldamdyqty baqylaý júıesi 2025 jylǵy 17 naýryzda iske qosyldy. Alǵashynda jalpy uzyndyǵy 3 myń shaqyrymǵa jýyq 11 aqyly jol bóligin qamtydy.
Atap aıtqanda: Astana – Şýchınsk; Astana – Pavlodar; Astana – Temirtaý; Shymkent – Qyzylorda; Shymkent – Taraz; Pavlodar – Semeı – Qalbataý; Oral – Reseı shekarasy (Saratov); Pavlodar – Reseı shekarasy (Omby); Almaty – Qorǵas; Kókshetaý – Petropavl; Aqtóbe – Qandyaǵash.
Bıylǵy 13 qazannan bastap bul tizimge taǵy tórt baǵyt qosyldy: Oral – Reseı shekarasy (Samara); Aqtóbe – Reseı shekarasy (Orynbor); Qostanaı – Denısovka; Qandyaǵash – Maqat.
Al 21 qazannan bastap Qonaev – Taldyqorǵan tasjolynyń qosylýymen ortasha jyldamdyqty baqylaý júıesi respýblıkalyq joldardyń 16 bóliginde jumys isteıtin bolady.
«QazAvtoJol» UK» AQ málimdeýinshe, júıeni keńeıtýdegi basty maqsat – jol-kólik oqıǵalarynyń aldyn alý, júrgizýshilerdiń jaýapkershiligin arttyrý jáne respýblıkalyq joldardaǵy qozǵalys qaýipsizdigin qamtamasyz etý.
Ulttyq kompanııa júrgizýshilerdi jol boıynda belgilengen jyldamdyqty saqtaýǵa jáne ózge jol qozǵalysyna qatysýshylardyń qaýipsizdigine jaýapkershilikpen qaraýǵa shaqyrdy.
Buǵan deıin QazAvtoJol júrgizýshilerge eskertý jasaǵanyn jazǵan edik.
