21 qazan. Týǵan kún ıeleri.

ESІMDER
63 jyl buryn (1955) qoǵam qaıratkeri, «Ult taǵdyry» qoǵamdyq birlestiginiń tóraǵasy Kóshim Qalmahanuly DOSMAHANBET dúnıege keldi.
Ońtústik Qazaqstan oblysynyń týmasy. S.M.Kırov atyndaǵy Qazaq memlekettik ýnıversıtetin fılologııa mamandyǵy boıynsha bitirgen (1981).
1981-1999 jyldary Abaı atyndaǵy Qazaq pedagogıkalyq ınstıtýtynyń qazaq tili kafedrasynda oqytýshy; 1999-2005 jyldary - «Ádil saılaý» qoǵamdyq qozǵalysynyń jaýapty hatshysy, respýblıkalyq táýelsiz baqylaýshylar jelisiniń prezıdenti; 2005 jyldyń qyrkúıek aıynan bastap «Ult taǵdyry» qoǵamdyq birlestiginiń prezıdenti; 2007 jyldan bastap Qazaqstan Respýblıkasy Parlament Májilisi janyndaǵy qoǵamdyq palata keńesiniń múshesi.
54 jyl buryn (1964) Qyzylorda qalalyq sotynyń tóraǵasy Muhtar Júsipbekuly ERKІNBEKOV dúnıege keldi.
Qyzylorda oblysynda týǵan. S.M.Kırov atyndaǵy Qazaq memlekettik ýnıversıtetiniń zańger mamandyǵyn bitirgen (1991).
Bul qyzmetke kelgenge deıin Jańaqorǵan aýdanynyń Birlik keńsharynda jumysshy, Qyzylorda qalalyq prokýratýrasynda stajer tergeýshi, tergeýshi, qalalyq tabıǵatty qorǵaý prokýratýrasynyń tergeýshisi, oblystyq prokýratýrada aǵa tergeýshi, odan keıin tergeý bóliminiń prokýrory, MTK-niń Shıeli aýdandyq bóliminiń bastyǵy, osy mekemeniń oblystyq departamentinde bólim bastyǵy, keıin basqarma bastyǵynyń orynbasary boldy. Qyzylorda qalalyq ІІB bastyǵynyń orynbasary, oblystyq qarjy polıtsııasy bastyǵynyń tergeý isi jónindegi orynbasary, Qyzylorda qalalyq sotynyń sýdıasy, Qyzylorda oblysynyń sottar ákimshisi, Baıqońyr qalalyq sotynyń tóraǵasy, Qyzylorda oblysynyń mamandandyrylǵan qylmystyq ister jónindegi sotynyń sýdıasy qyzmetterin atqarǵan.
2017 jyldyń maýsym aıynan bastap qazirgi qyzmetinde.
185 jyl buryn (1833-1896) shved ónertapqyshy ári kásipkeri, London koroldik qoǵamynyń jáne Shved ǵylym akademııasynyń múshesi Alfred Bernhard NOBELЬ dúnıege keldi.
Shvetsııanyń Stokgolm qalasynda týǵan. Ǵalym 1864 jyly kúrkireýik synapty kapsıýl-detonator jasaıdy, al 1867 jyly dınamıt jasaý jumysyna patent alyp, ony úlken kólemde shyǵarýǵa kirisedi. Sóıtip orasan zor baılyqqa ıe bolady. Ózi qaıtys bolarynyń aldynda ósıet qaldyryp, artyndaǵy murasynyń ósiminen jyl saıyn ǵylym men mádenıet salasyndaǵy eń eleýli jańalyqtarǵa syılyq taǵaıyndaýdy amanattap ketken. Osylaısha halyqaralyq Nobel syılyǵy paıda boldy.