21 qazan. QazAqparat kúntizbesi
ESTE QALAR OQIǴALAR
1868 jyly Aqmola oblysy quryldy. Onyń quramyna Kókshetaý, Atbasar jáne Aqmola ýezderi, sondaı-aq Omby jáne Petropavl qalalarynda turǵan Sibir kazaktary áskerleriniń І, V jáne VI polky okrýgteriniń ýchaskeleri kirdi.
1930 jyly elimizdegi eki eski joǵary oqý orny - Almaty zooveterınarlyq jáne Qazaq aýyl sharýashylyǵy ınstıtýtynyń bazasynda Qazaq ulttyq agrarlyq ýnıversıteti quryldy. Joǵary oqý orny qyzmet atqarǵan jyldary 100 myńnan astam maman daıyndalyp, olar elimizdiń agrarlyq ónidirisi men ǵylym jáne bilim salasynyń damýyna óz úlesterin qosty.
1996 jyly Tashkentte túrki tildes memleketter basshylarynyń kezdesýi ótti. Kezdesýge Qazaqstan Respýblıkasynyń Prezıdenti Nursultan Nazarbaev qatysty.
2003 jyly Astanada Transport Tower atty jańa ákimshilik-tehnologııalyq keshen ashyldy.
2004 jyly Memleket basshysy Almatydaǵy rezıdentsııasynda Azııadaǵy Ózara is-qımyl men senim sharalary jónindegi keńeske qatysýshy elderdiń Syrtqy ister mınıstrlerimen kezdesti.
2004 jyly Pavlodar oblysy ákimdiginde «QazAqparat» UK» AQ tyń jáne tyńaıǵan jerlerdi ıgerýdiń 50 jyldyǵyna arnap basyp shyǵarǵan «Tyń jer: keshe, búgin, erteń» atty kitaptyń tusaýkeser rásimi boldy. Basylymǵa alǵash ret qazaqstandyq tyń ıgerýshilerdiń derekti aıǵaqtary, fototúsirilimder men materıaldar engen.
2004 jyly Semeıdegi «Roza» JShS álemdegi eń úlken baıpaq jasap shyǵardy. Onyń ólshemi - 106, qonyshynyń bıiktigi 178 santımetr jáne salmaǵy 16,5 kg.
2005 jyly Tarazda jańa óndiris - Qazaqstandaǵy birden-bir keramzıt buıymdaryn óndiretin zaýyttyń tanystyrylymy boldy.
2009 jyly Astanada Qazaqstannyń tuńǵysh jel atlasynyń tanystyrylymy ótti.
Atalǵan jel atlasy - Qazaqstan aýmaǵyndaǵy kez kelgen núktedegi jeldiń jyldyq ortasha jyldamdyǵy jaıynda habardar etetin ınteraktıvti karta. Atlasty jasaýshylardyń aıtýynsha, Qazaqstan jeriniń 50 myń sharshy shaqyrymy jel energetıkasyn damytýǵa qolaıly. Al osy áleýet paıdaǵa jaratylatyn bolsa, jylyna 900 myń GVt/saǵ. elektr energııasy alynady dep boljanýda. Atlas - jel energııasyn alýdyń tıimdi, basymdyqty aımaqtaryn ońaı anyqtaýǵa múmkindik berip, osy salaǵa ınvestıtsııalar tartýǵa, jel energııasyn óndirý kórsetkishterin arttyrýǵa jol ashady.
2011 jyly Qostanaıda Tobyl ózeni arqyly ótetin jańa kópirde kólik qozǵalysy saltanatty túrde ashyldy. Kópir uzyndyǵy - 313 metr, ol «Astana-Qostanaı- Chelıabi» halyqaralyq dáliziniń bir bóligi.
2011 jyly Qaraǵandyda qazaqtyń belgili ǵalymy, qoǵam jáne memleket qaıratkeri Qanysh Sátbaevqa eskertkish ashyldy.
2011 jyly Almatyda Túrkitildes memleketter yntymaqtastyq keńesiniń І Sammıti ashyldy. Oǵan Qazaqstan, Ázerbaıjan, Qyrǵyzstannyń basshylary qatysty. Sammıt qorytyndysynda Almaty deklaratsııasyna qol qoıyldy.
2012 jyly Qazaqstan Prezıdenti Nursultan Nazarbaev Avstrııa Respýblıkasyna resmı saparmen bardy. Sapar barysynda Elbasy Avstrııanyń Federaldy Prezıdenti Haınts Fıshermen jáne Avstrııanyń basqa saıası jáne iskerlik orta ókilderimen kezdesip, qazaqstandyq-avstrııalyq bıznes-forýmnyń ashylýyna qatysty.
2012 jyly Túrkııadaǵy Qazaqstan Respýblıkasynyń mádenı kúnderi aıasynda Ystanbuldyń arheologııalyq mýzeıinde «Ejelgi kóshpendiler altyny jáne Qazaqstannyń zergerlik óneri» degen taqyryppen «Altyn adam» kórmesiniń tusaýkeseri ótti.
2013 jyly «Astana Opera» memlekettik opera jáne balet teatrynyń álemdik premera keshin Dj.Verdıdiń «Atılla» operasy ashty. Premerada Memleket basshysy Nursultan Nazarbaev boldy.
2015 jyly Oslo qalasynda álemniń Nobel ınstıtýtynda «Qazaqstandaǵy MAGATE-de jańa tómen baıytylǵan ýran banki. Qarýdy taratpaý rejiminiń ınnovatsııalyq aspaby» atty taqyrypta konferentsııa ótti.
Qatysýshylar ıadrolyq qarýdan erikti túrde bas tartqan, Semeıdegi ıadrolyq synaq polıgonyn japqan Qazaqstan aýmaǵynda tómen baıytylǵan ýran bankin ornalastyrý bastamasyn joǵary baǵalady.