21 qańtarda elimizde Injenerlik áskerler kúni atap ótiledi
«Atalmysh qurylym Qarýly kúshterdiń qurylǵan sátinen bastap qyzmet etýde. Armııada olarǵa jaýyngerlik is-qımyldardy júrgizý úshin jaǵdaı jasaý boıynsha aıryqsha tapsyrma júktelgen. Qarýly kúshterde ınjenerlik áskerler qozǵalys joldaryn, kóshirý manevrlerin ınjenerlik barlaý, mına-jarylǵysh qorshaýlardy ornatý, joldardy, sý kedergileri arqyly ótkelderdi jabdyqtaý jáne ustaý, shepterdi, bekinisterdi, áskerı bólimderdiń ornalasý pýnktterin fortıfıkatsııalyq jabdyqtaý, basqarý pýnktterin óristetý boıynsha tutas tapsyrmalar keshenin oryndaıdy», delingen habarlamada.
Áskerı ınjenerlerdiń pishimi men aýqymy boıynsha elimizdiń aýmaǵynda jáne odan tysqary jerde ótetin oqý-jattyǵýlar men mıssııalarǵa qatysýda mol tájirıbeleri bar. Olardyń biri - Iraktaǵy bitimgershilik mıssııa. 2003 jyl men 2008 jyl aralyǵynda «Qazbat» bitimgershilik batalonynyń ınjenerlik-saperlik bólimshesi turaqtandyrǵysh kúshter quramynda jerde jarylmaǵan oq-dáriler izdestirý, anyqtaý, belgileý jáne olardy joıý, sýmen qamtamasyz etý pýnktterin jabdyqtaý jáne sýdy tazartý boıynsha tapsyrmalardy oryndady.
Ol kezde qazaqstandyq áskerı qyzmetshiler joǵary kásipqoılyq pen sheberlikti, tapsyrmalardy oryndaýda jaýapkershilik pen naǵyz batyldyqty pash etti.
Búginde ınjenerlik áskerler - bul mamandarmen jasaqtalǵan, áskerı tehnıkamen, ınjenerlik qarý-jaraq quraldarymen jabdyqtalǵan quramalar men áskerı bólimder. Injenerlik áskerler jaqynda jańa zamanaýı úlgilermen, ıaǵnı, jer qazatyn ınjenerlik tehnıkamen, mına-jarylǵysh qorshaýlardy ornatýǵa arnalǵan tehnıkamen tolyǵady, ınjenerlik barlaýdy júrgizý, áskerlerdiń ornalasý aýdandaryn, qorǵanys shepteri men bekinisterdi fortıfıkatsııalyq jabdyqtaý, sondaı-aq, sý shyǵarý jáne ony tazartýdy qamtamasyz etý sııaqty mindetterdi atqarady dep kútilýde.
