21 atyraýlyq qajylyq saparǵa attandy

ATYRAÝ. QazAqparat - Atyraýda qajylyqqa baratyndar sany jyl saıyn artyp keledi. 21 atyraýlyq QMDB janynan ashylǵan «Taýaf Trevel» qajylyq kompanııasy arqyly qasıetti saparǵa attandy, dep habarlaıdy QazAqparat tilshisi.

Qazaqstan musylmandary dinı basqarmasynyń munaıly ólkedegi ókili, «Imanǵalı» ortalyq meshitiniń bas ımamy Batyrjan Mansurov  qajylyq saparǵa attanyp bara jatqan atyraýlyq jamaǵatpen arnaıy júzdesip, qadamdaryna sáttilik tiledi.

Qasıetti sapardy súnnetke saı ótep kelýge tilektestigin bildirgen ókil ımam Batyrjan Berdenuly musylman qaýymǵa paryz bolǵan qajylyqtyń mańyzy týraly aıtyp ótti.

«Qajylyq - ıslam dinindegi negizgi bes paryzdyń sońǵysy. Sharıǵat boıynsha kámeletke tolǵan, aqyl-esi durys, densaýlyǵy jaqsy, dáýleti jeterlik, ózgege qaryzy joq musylman ǵana qajylyq paryzyn óteı alady. Qasıetti Quranda: «Alla úshin Qaǵbaǵa qajylyq etý - adamdarǵa paryz» («Álı-Imran» súresi, 97 aıat) dep aıtylsa, hadıs sharıfte «Islam bes negizge qurylǵan: Alla Taǵaladan basqa Táńir joq jáne Muhammed onyń elshisi (s.ǵ.s) dep kýálik etý. Namaz oqý. Zeket berý. Ramazan aıynda tolyq oraza ustaý. Qajylyqqa barý» delingen», - dep atap ótti ókil ımam.

Aıta ketelik, ortalyq «Imanǵalı» meshitinde qajylarǵa sát sapar tilep, qurmet kórsetý - jyldaǵy dástúr. Bıylǵy meshittegi basqosýǵa qajylyq mindetin buryn-sońdy atqarǵan kisiler de qatysyp, jerlesterine qutty qadam tilesti. Aq tilekter aıtylǵan izgi sharada qasıetti saparǵa attanýshylarǵa bas ımam batasyn berdi.