21 aqpan. Jylnama
Kazinform oqyrman nazaryna 21 aqpanǵa arnalǵan ataýly kúnder men este qalar oqıǵalar kúntizbesin usynady.
ATAÝLY KÚNDER
Halyqaralyq ekskýrsııa júrgizýshi (gıd) kúni
Ekskýrsııa júrgizýshilerdiń halyqaralyq federatsııasynyń bastamasy boıynsha jyl saıyn álemniń barlyq ekskýrsııa júrgizýshileri jáne gıdteri atap ótedi. 1990 jyly WFTGA (World Federation of Tourist Guide Associations) prezıdenti Tıtına Loızıdes alǵashqy Halyqaralyq ekskýrsııa júrgizýshi kúnin uıymdastyrýshylardyń biri bolǵan.
Halyqaralyq Ana tili kúni
1999 jylǵy qarashada ıÝNESKO Bas Konferentsııasy 30-sessııasynyń sheshimimen bekitilgen jáne 2000 jylǵy aqpannyń 21-inen bastap tildik jáne mádenı ár alýandyqty qorǵaý maqsatynda atalyp ótedi.
ESTE QALAR OQIǴALAR
1929 jyly BKP (b) Ortalyq Komıtetiniń barlyq partııa uıymdaryna arnalǵan «Eńbek tártibin nyǵaıtý týraly» haty jarııalandy. Eldegi eńbek tártibiniń qataıǵany sonshalyq, jumysqa sebepsiz keshikkeni úshin sottaı salý, túrmege jaýyp tastaý ádettegi iske aınaldy.
1992 jyly Qazaqstan Respýblıkasynyń Prezıdenti men Úndistan Premer-mınıstri Qazaqstan Respýblıkasy men Úndistan Respýblıkasy arasynda dıplomatııalyq qatynastar ornatý týraly hattamaǵa, Úndistan Memlekettik banki men Qazaqstan Syrtqy ekonomıkalyq qyzmet banki arasyndaǵy kelisimge, QR Úkimeti men Úndistan Úkimeti arasynda konsýldyq katynastardyń ornatylýy týraly hattamaǵa qol qoıdy.
1992 jyly Atyraý oblysynyń Balyqshy aýdanyndaǵy orta mektepke aqyn, Qazaqstan Respýblıkasy Memlekettik syılyǵynyń laýreaty Farıza Ońǵarsynovanyń esimi berildi.
2012 jyly Venadaǵy «Kýnstlerhaýs» Sýretshiler úıinde tanymal qazaqstandyq sýretshi Erbolat Tólepbaıdyń jeke kórmesi ashyldy. Onyń jumystary álemniń 35 elinde kórmege qoıylǵan.
2014 jyly rejısser Serik Aprymovtyń «Baýyr» fılmi balalar jáne jasóspirimderge arnalǵan «Ciné Junior» XXIV halyqaralyq kınofestıvalinde Halyqaralyq arthaýs kınoteatrlary konfederatsııasynyń syılyǵyn (C.I.C.A.E.) aldy. C.I.C.A.E. qazylar alqasynyń quramynda Frantsııa jáne Belgııadaǵy arthaýs kınoteatrlarynyń kıno kórsetilimderin úılestirýshiler boldy.
2016 jyly Estonııada ótken balalar men jasóspirimderge arnalǵan ІІ ashyq halyqaralyq vokaldyq «Soprus» festıval-baıqaýynda 14 jasar ońtústikqazaqstandyq Karına Nájimeddınova birinshi syılyq laýreaty atandy. Baıqaýǵa álemniń ár elinen 50 konkýrsant qatysty.
2017 jyly shańǵyshy Rınat Mýhın Sapparoda ótken VIII qysqy Azııa oıyndarynda 15 shaqyrymdyq jeke jarysta Qazaqstan qorjynyna alǵashqy altyn medaldi saldy. Jalpy, Azııa oıyndarynda Qazaqstan quramasy 32 medal jeńip aldy, onyń 9-y - altyn, 11-i – kúmis, 12-si – qola.
2018 jyly Ankarada «Alashtyń aqıyq aqyny: Maǵjan Jumabaevqa 125 jyl» konferentsııasy ótti jáne Kechıoren aýdanyndaǵy saıabaqta Maǵjan Jumabaevtyń eskertkishi ashyldy. Atalǵan sharalar TÚRKSOI Halyqaralyq túrki mádenıeti uıymy jarııalaǵan «Maǵjan Jumabaev jyly» aıasynda ótken bolatyn.
2018 jyly «Astana Operanyń» tenor partııasyndaǵy eń jas ártisi balalar stýdııasynyń solısi 10 jasar Qajymurat Erkin alǵash ret sahnaǵa shyqty.Ol kúrdeli vokaldyq partııany keremet ıgerip qana qoımaı, jańa sahnalyq beıneni de kórsetti. Mundaı tájirıbe ómirde buryn-sońdy bolmaǵan, ıaǵnı tenorǵa arnap jazylǵan róldi bala daýsy oryndamaǵan eken.
2019 jyly Almatyda «Dombyra» telearnasynyń tusaýy kesildi. «Dombyra» telearnasy – qazaq halqynyń rýhanı jan serigine aınalǵan mýzykalyq tól aspaptaryn, dástúrli ánderi men ulttyq kúılerin halyqqa barynsha nasıhattaıtyn jańa formattaǵy telearna bolýdy kózdeıdi. Baǵdarlamalar táýlik boıy qazaq tilinde júrgiziledi. Onyń efırinde otandyq ónerpazdardyń án-kúı, jyrlardy kórsetiledi. Aspaptardy úırený mektebi, qolóner sheberleri jaıly baǵdarlamalar túsiriledi.
2020 jyly qazaqstandyq shahmatshy Gúlmıra Dáýletova IM Round robin Third Saturday 129 týrnırin jeńip alyp, áıelder grossmeısteriniń úshinshi balyn jáne erler sheberiniń birinshi balyn oryndady. Týrnır 11 týrdan turdy, alaıda 10 týrdan keıin G. Dáýletova 11 myqty shahmatshyny artta qaldyryp, merziminen buryn jeńiske jetti. 11 týrda Gúlmıra birde-bir partııadan utylmaı, 9 upaı jınady. Sportshy ELO reıtıngisinde 65 upaıǵa kóterilip, 2487 performans kórsetti. Týrnır Novı Sad qalasynda (Serbııa) ótti.
2022 jyly Frantsııanyń Mets qalasynda ústel tennısinen WTT Youth Contender jastar týrnıri aıaqtaldy. Onda 15 jasqa deıingi jas sanatynda qazaqstandyq Alan Qurmanǵalıev jeńiske jetti.
