21 adam vırýs juqtyrǵan Kók bazar basshylyǵy 2 mln teńgege jýyq aıyppul tóleıdi
ALMATY. QazAqparat - Almatyda sanıtarlyq talapty saqtamaǵan Kók bazar basshylyǵyna 1 mln 722 myń teńge aıyppul salyndy. Bul týraly onlaın brıfıng barysynda qalanyń bas sanıtarlyq dárigeri Jandarbek Bekshın aıtty, dep habarlaıdy QazAqparat tilshisi.
«Ózderińiz bilesizder, naýryzda Almatyda koronavırýs kóbinese syrttan kelgen adamdardan tabyldy. Qazir vırýs taralý kórsetkishi artyp keledi. Kóbinese adamdar ózderi emdeý mekemelerine habarlasyp jatyr. Onyń ishinde «Rahat» fabrıkasyn, Kók bazardy aıtýǵa bolady. «Rahat» fabrıkasy óz erkimen 2 aptaǵa jabyldy. Kók bazardyń jumysy sot sheshimimen 1 aıǵa toqtatyldy. Sebebi, tórt organnyń ókilderinen quralǵan monıtorıng jumystary barysynda berilgen eskertýlerdi ýaqytynda oryndamaǵany úshin bazar basshylyǵyna 1 mln 722 myń teńge aıyppul salyndy», - dedi Jandarbek Bekshın.
Almatydaǵy Kók bazarda koronavırýs 20 adamnan anyqtalǵany týraly munyń aldynda jazǵan edik.
Odan keıin taǵy bir adamnyń taldaýy oń nátıje kórsetken.
