21-28 sáýir aralyǵynda negizgi azyq-túlik baǵalary qalaı ózgerdi?
ASTANA. QazAqparat - «Qazagromarketıng» AQ-nyń júrgizgen bólshek saýda baǵalarynyń monıtorıngi boıynsha 2015 jyldyń 21-28 sáýiri aralyǵynda el aımaqtary boıynsha azyq-túlik baǵalaryna birshama ózgerister tirkeldi. Bul týraly kompanııanyń baspasóz qyzmetinen habarlandy.
Atap aıtqanda, atalǵan ýaqyt ishinde bakaleıa ónimderi arasynda baǵa ózgerisi baıqaldy.
Máselen, Astanada arpa jarmasynyń baǵasy13 paıyzǵa kelisine 126 teńgeden 110 teńgege deıin tómendedi. Bul rette qaptan ólshenip satylatyn arzan ónim mólsheriniń artýy ortasha baǵa kórsetkishteriniń arzandaýyna áser etti. Kóterme saýda baǵalary ózgerissiz - 55 teńge shamasynda qalǵan. Sonymen qatar, Astanada bıdaı jarmasy 12 paıyzǵa arzandap, kelisi 126 teńge quraǵan. Bul da satylymda qaptan ólshenip satylatyn arzan ónim mólsheri artýynyń, ortasha baǵa kórsetkishteriniń arzandaýyna áser etýimen túsindiriledi. Esepti kezeńde, et jáne sút ónimderi arasynda aıtarlyqtaı baǵa ózgerisi (10%-dan artyq) anyqtalmaǵan.
Al jemis-kókónis ónimderine kelsek, Shymkent qalasynda qııar baǵasy 18 paıyzǵa, ıaǵnı kelisi 400-den 330 teńgege deıin arzandaǵan. Buǵan naryqtyń otandyq óndirýshilerdiń arzan jylyjaı ónimimen tolyǵýy áser etken. Kerisinshe, Óskemende qııar 12 paıyzǵa 452 teńgeden 507 teńgege qymbattady. Baǵa ósimi ónim jetkiziliminiń azaıýymen (joldardy sýdyń basýy sebebinen) jáne kóterme baǵalardyń 41 paıyzǵa artýymen túsindiriledi.
Sonymen qatar, pııaz baǵasy Óskemende kelisine 135 teńgeden 153 teńgege deıin, Shymkentte 89 teńgeden 100 teńge, Oralda 98 teńgeden 109 teńgege deıin qymbattaǵan. Bul ónim qorynyń azaıýy men kókónisti saqtaýǵa ketken shyǵynnyń artýyna baılanysty oryn alǵan maýsymdyq baǵa ósiminiń áserinen bolyp tabylady.
Osy kezeń ishinde Atyraýda kartop 16 paıyzǵa, ıaǵnı kelisi 122 teńgeden 103 teńgege arzandaǵan. Baǵalardyń tómendeýi naryqtyń ónimmen qanyǵýymen suranystyń tómendeýimen túsindiriledi. Kóterme baǵalar kerisinshe bir apta ishinde 3 paıyzǵa qymbattaǵan.
«Al Petropavlda qyryqqabat baǵasy 26 paıyzǵa, Pavlodarda 23 paıyzǵa, Oralda 17 paıyzǵa, Qostanaıda 16 paıyzǵa jáne Astanada 12 paıyzǵa qymbattady. Bul - ónim qorynyń azaıýy men kókónisti saqtaýǵa ketken shyǵynnyń artýyna baılanysty oryn alǵan maýsymdyq baǵa ósimi. Sonymen birge, baǵanyń ósýine satylymda qymbat ımportty erte pisetin suryptardyń paıda bolýy da áser etti», - delingen baspasóz baıanynda.
Osy kezeńde sábiz Kókshetaýda 95 teńgeden 130 teńgege, Óskemende kelisine 110 teńgeden 133 teńgege, Astanada 111 teńgeden 127 teńgege deıin qymbattady. Buǵan da ónim qorynyń azaıýy men maýsymdyq baǵa ósimi áser etip otyr.
Aıta keteıik, «Qazagromarketıng» AQ apta saıyn ár seısenbi kúni azyq-túlik taǵamdarynyń 66 túri boıynsha elimizdiń barlyq oblys ortalyqtary men Astana, Almaty qalalarynda baǵa monıtorıngin ótkizedi.
