21-27 qańtar aralyǵynda Astana qalasynyń Almaty, Esil jáne Saryarqa aýdandarynyń ákimderi halyq aldynda esep beredi

Bul týraly elorda ákimdiginiń baspasóz qyzmetinen málim etti.

Qazaqstan Respýblıkasy Prezıdentiniń Jarlyǵyna sáıkes, barlyq deńgeıdegi ákimderdiń halyq aldyndaǵy eseptik kezdesýleri osymen altynshy jyl qatarynan ótkizilip keledi.

Sońǵy jyldardaǵy kezdesýlerge jasalǵan taldaý astanalyqtardyń ómirindegi basymdyqtar júıesi qandaı ózgeriske ushyraǵanyn aıqyn kórsetedi. Eger osydan úsh jyl buryn basty másele aıaqtalmaǵan úleskerlik qurylys bolyp, turǵyndar Astana ákimi Imanǵalı Tasmaǵambetovke óz problemalaryn jetkizýge asyqsa, búgingi tańda bul problemalar sheshimin tapty. Al ótken jyly turǵyndar mektepke deıingi bilim beretin mekemelerdegi oryn tapshylyǵy túıtkilin kóterdi. Elbasynyń tapsyrmasymen jasalǵan «Balapan» baǵdarlamasy aıasynda Astanada bir jyldyń ishinde 14 myńǵa jýyq búldirshin balabaqshalarǵa joldama aldy.

Sondaı-aq ata-ananyń qamqorlyǵynan aıyrylǵan balalar men balalar úıleri túlekteriniń elorda ákimine bildirgen ótinishteri boıynsha, 2010 jyly atalmysh sanatqa jatatyn 20-dan astam bala baspanaly boldy.

Aýdan ákimderimen kezdesýlerde kóteriletin máseleler de tıimdi sheshilip keledi. Alaıda qalalyq bılik pen turǵyndardyń aldynda talqylanyp, sheshimin tabýy tıis qajettilikter áli de bar.

Osy kúnderi qalada 32 jerge aýdan ákimderiniń jumysy boıynsha turǵyndardan ótinishter men eskertýlerdi jınaýǵa arnalǵan arnaıy jáshikter ornatylyp jatyr. Ákimder olarǵa 21-27 qańtar kúnderi jaýap beretin bolady. Sondaı-aq osy kezdesýler barysynda turǵyndar saýaldaryn tikeleı joldaı alady. Eseptikkezdesýlerdiń naqty qaı kúni, qaı jerde jáne qandaı ýaqytta ótetindigi týraly tolyq aqparatty www.astana.kz resmı saıtynan bilýge bolady.