21 250 teńge úshin azamattar ótinimdi qaıta berýi kerek pe
NUR-SULTAN. QazAqparat – Tamyz aıynda karantın eki aptaǵa sozylatyndyqtan azamattarǵa 42 500 teńgeniń ornyna - 21 250 teńgeden beriletin boldy.
Osy somany alý úshin azamattar ótinimdi qaıta berýi kerek pe? Bul suraqqa Ortalyq kommýnıkatsııalar qyzmetinde ótken baspasóz máslıhatynda Úkimet basshysynyń orynbasary Eraly Toǵjanov jaýap berdi, dep habarlaıdy QazAqparat tilshisi.
«Búgingi kúnge deıin 2,1 mln adam, sonyń ishinde proaktıvti formatta da 42 500 teńgeni alǵan bolatyn (shilde úshin). Qazirgi ýaqytta bul sharýamen Eńbek jáne halyqty áleýmettik qorǵaý mınıstrligi aınalysyp jatyr. Buryn bir rettik áleýmettik tólemdi alǵan azamattardyń málimetteri bazada bar. Sondyqtan olarǵa proaktıvti formatta tólem taǵaıyndalady», - dedi Úkimet basshysynyń orynbasary.
Eske sala ketsek, buǵan deıin Eraly Toǵjanov tamyz aıynda karantın eki apta bolǵandyqtan azamattar 42 500 teńgeniń ornyna 21 250 teńgeden alatynyn habarlaǵan bolatyn.
«Bul máselege qatysty Prezıdenttiń tikeleı tapsyrmasy bar: eki aptaǵa sozylǵan karantınge baılanysty tólem mindetti túrde júrgiziledi. Alaıda, burynǵy somanyń jartysy, ıaǵnı 42 500 teńgeniń jartysy – 21 250 teńgeden beriledi. Bul qarjyny bizdiń azamattar mindetti túrde alady», - dedi Eraly Toǵjanov.
