208 myńnan asa qazaqstandyq arnaıy memlekettik járdemaqy alady

ASTANA. KAZINFORM — El aldyndaǵy aıryqsha eńbegi úshin nemese tótenshe jaǵdaılar saldarynan zardap shekken azamattarǵa qosymsha áleýmettik kómek retinde respýblıkalyq bıýdjetten aı saıyn arnaıy memlekettik járdemaqy tólenedi, dep habarlaıdy Eńbekmıni.

QR Eńbek jáne halyqty áleýmettik qorǵaý mınıstrligi usynǵan aqparatqa sáıkes 2025 jylǵy 1 tamyzdaǵy jaǵdaı boıynsha, járdemaqy alýshylar sany 208 668 adamdy qurady, olarǵa 15,7 mlrd teńge tólendi.

Bul memlekettik qoldaý túri Qazaqstanda 1999 jyly engizildi jáne halyqty áleýmettik qorǵaý júıesiniń mańyzdy elementi bolyp sanalady.

AMJ alýǵa quqyly azamattardyń 17 sanaty Qazaqstan Respýblıkasy zańnamasymen belgilengen. Olardyń qatarynda Uly Otan soǵysynyń ardagerleri men basqa memleketterdiń aýmaǵynda ótken áskerı is-qımyldarǵa qatysqan ardagerler; Uly Otan soǵysynyń ardagerlerine teńestirilgen azamattar; Uly Otan soǵysy kezinde qaza tapqan jaýyngerlerdiń áıelderi men qaza tapqan áskerı qyzmetkerlerdiń otbasy músheleri; «Halyq qaharmany», «Qazaqstannyń Eńbek Eri» ataqtaryna ıe bolǵandar; tyl eńbekkerleri; Chernobyl atom elektr stantsııasyndaǵy apattyń saldaryn joıýǵa qatysqandar; saıası repressııalardyń qurbandary, múgedektigi bar adamdar nemese zeınetkerler; Qazaqstan Respýblıkasy aldyndaǵy erekshe eńbegi úshin zeınetaqy taǵaıyndalǵandar jáne basqa da azamattar.

— Járdemaqy mólsheri alýshynyń sanatyna baılanysty jáne 2,13-ten 138,63 aılyq eseptik kórsetkishke (ári qaraı — AEK) deıin ózgerip otyrady. Arnaıy memlekettik járdemaqy mólsheri jyl saıyn AEK mólsheriniń artýyna baılanysty, respýblıkalyq bıýdjet týraly zańda belgilengen tártip boıynsha kóteriledi. Aıta ketý kerek, eger azamat birneshe negiz boıynsha AMJ alýǵa quqyly bolsa, járdemaqy tek olardyń bireýi boıynsha, óz tańdaýy eskerilip tólenedi, — delingen mınıstrlik habarlamasynda.

Qazaqstan Respýblıkasynda turaqty turatyn sheteldikter men azamattyǵy joq tulǵalar da QR azamattarymen teń dárejede arnaıy memlekettik járdemaqy alýǵa quqyly. AMJ taǵaıyndaý úshin ótinishti eGov.kz portaly arqyly nemese halyqqa qyzmet kórsetý ortalyqtarynda berý kerek.

Buǵan deıin múgedektigi jáne asyraýshysynan aıyrylý boıynsha 434 mlrd teńgeden asa járdemaqy tólengeni belgili boldy.