2060 jylǵa qaraı Polshanyń halqy 25%-ǵa azaıýy múmkin

ASTANA. KAZINFORM — Polshanyń Bas statıstıka basqarmasynyń sońǵy modeldeý nátıjeleri boıynsha, aldaǵy onjyldyqtarda el halqynyń sany kúrt qysqarýy múmkin, dep habarlaıdy BELTA.

Eger qazirgi úrdis saqtalsa, 2060 jylǵa qaraı Polshanyń halqy shamamen 25 paıyzǵa, ıaǵnı 9 mıllıon adamǵa azaıýy yqtımal

Bas statıstıka basqarmasynyń 2023–2060 jyldarǵa arnalǵan halyq sanynyń boljamy úsh túrli stsenarııdi qarastyrady: tómen, joǵary jáne ortasha.

2025 jyldyń qarashasynda jarııalanǵan bul modeldeý halyq sanynyń 2060 jylǵa deıingi tájirıbelik boljamyn kórsetedi. Alaıda barlyq stsenarıılerde el halqynyń júıeli túrde azaıatyny atap ótilgen.

Eń nashar nusqada, týý kórsetkishiniń tómen bolýyn eskersek, 2060 jylǵa qaraı halyq sany 28,4 mıllıon adamǵa deıin, ıaǵnı 2024 jylmen salystyrǵanda 24,3 paıyzǵa azaıady.

Eń optımıstik nusqada, ómir súrý uzaqtyǵynyń artýy jaǵdaıynda, halyq sany 32,3 mıllıon adamǵa deıin, ıaǵnı 13,9 paıyzǵa tómendeıdi.

Baıandamada 2000–2017 jyldar aralyǵynda Polshadaǵy týý koeffıtsıenti 1,22 men 1,45 aralyǵynda bolǵany, al sońǵy jyldary bul kórsetkish turaqty túrde tómendep kele jatqany aıtylady.

2024 jyly týý deńgeıi tarıhı eń tómen kórsetkish — 1,10-ǵa deıin túsken.

Modeldeý nátıjeleri boıynsha, týý kórsetkishi osy deńgeıde tómen kúıinde qala beredi dep boljanyp otyr. Sonymen qatar, 2060 jylǵa qaraı eńbekke qabiletsiz jastaǵy adamdardyń sany eńbekke qabilettilerden asyp túsedi dep kútiledi.

Fakt basylymynyń habarlaýynsha, qoǵamnyń qartaıýy men eńbekke qabiletti halyq sanynyń azaıýy eńbek naryǵyna, zeınetaqy júıesine jáne jalpy ekonomıkaǵa eleýli áser etýi múmkin.

Osyǵan deıin Polsha prezıdenti elge NATO áskerin engizýge ruqsat bergenin jazǵan edik.