2050 jyly Qazaqstanda 65 jastan asqandardyń sany eki ese kóbeıedi – zertteý
BUU-nyń Qazaqstandaǵy halyq qonystanýy salasyndaǵy keńsesi (ıÝNFPA) Qazaqstandaǵy qart adamdardyń jaǵdaıy men qajettilikterine jáne belsendi uzaq ómir súrý ındeksine zertteý júrgizdi.
«Zertteý nátıjeleri Qazaqstannyń halyqtyń demografııalyq qartaıýynyń salystyrmaly erte satysynda ekenin kórsetti. 2050 jylǵa qaraı 65 jastan asqan adamdardyń sany 2019 jylmen salystyrǵanda eki ese artady (1,4-ten 3,4 mıllıon adamǵa deıin), al olardyń jalpy halyq sanyndaǵy úlesi 2019 jylǵy 7,5%-dan 2050 jyly 14%-ǵa deıin artatynyn anyqtady. Zertteý barysynda 55 jáne odan joǵary jastaǵy 2000 respondentten, memlekettik organdar men azamattyq qoǵam ókilderinen turatyn 20 sarapshydan saýalnama alyndy, olar Qazaqstanda alǵash ret Belsendi uzaq ómir súrý ındeksin (BUI) esepteý úshin paıdalanyldy. Budan basqa, ıÝNFPA Qazaqstanǵa qoldanylatyn laıyqty, salaýatty jáne belsendi uzaq ómir súrý salasyndaǵy halyqaralyq saıasatqa taldaý jasady», - deıdi Qazaqstandaǵy ıÝNPFA ókildigi.
Belsendi uzaq ómir súrý ındeksiniń (BUI) jıyntyq máni boıynsha Qazaqstan 30 eldiń ishinde 9-shy orynda tur. Onyń eń jaqyn kórshileri Frantsııa men Estonııa bolyp tur. Qazaqstannyń Belsendi uzaq ómir súrý ındeksi boıynsha reıtıng kóshbasshysy – Shvetsııanyń ındeksinen 8,8-t.t. az jáne kerisinshe, EO-tyń 28 eli ishinde BUI ortasha máninen 2,6 t.t. joǵary.
Qolaıly orta men belsendi uzaq ómir súrý úshin múmkindikter domenindegi osyndaı joǵary pozıtsııalarǵa eń aldymen, Qazaqstannyń qart azamattarynyń joǵary bilim deńgeıi arqasynda qol jetkizilgen.
Bul kórsetkish boıynsha respýblıka kóptegen Eýropa elderi men Reseıden ozyp tur.
«2008 jylmen salystyrǵanda egde adamdardyń qarjylyq jaǵdaıynyń jaqsarýyna qaramastan, birqatar problemalar saqtalýda. Mysaly, árbir 5-shi egde jastaǵy qazaqstandyq qıyn qarjylyq jaǵdaıda bolyp otyr. Medıtsınalyq qyzmetter qoljetimdi bolýy kerek dep sanaıtyn respondentterdiń úlesi 2008 jylǵy 35%-dan 2020 jyly 48%-ǵa deıin ósti. 2008 jyly egde jastaǵy adamdardyń 45%-y qoǵamda qarttarǵa qatysty zorlyq-zombylyq bar dep málimdese, 2020 jyly bul kórsetkish 61%-ǵa deıin ósken», - deıdi Qazaqstandaǵy ıÝNPFA ókildigi.
