2050 jyly Almaty muzdyqsyz qalýy múmkin
ALMATY. 26 shilde. QazAqparat - Klımattyń ózgerýinen 2050 jyly Eýropada 2003 jylǵy aptap ystyq qalypty jaǵdaıǵa aınalýy yqtımal.
Bul jaıly búgin Almatyda «Muzdyqtar áýeni» jobasy aıasyndaǵy ekspedıtsııa qorytyndysyna arnalǵan baspasóz máslıhatynda aıtyldy.
«Aptap ystyqtan 2003 jyly Eýropa elderi, 2010 jyly - máskeýlikter, al 2011 jyly alapat borannan Almatyda aǵashtar qulady. Ǵalymdar biraýyzdan klımattyń ózgerýine oraı mundaı ahýal aldaǵy ýaqytta ulǵaıa túsedi dep sanaıdy. Máselen 2050 jyly Almaty muzdyqsyz qalýy múmkin», - deıdi «Muzdyqtar áýeni» jobasynyń ǵylymı jetekshisi Danıel Dendra. Negizgi mamandyǵy sáýletshi bolyp sanalatyn ol: "Temperatýranyń kóterilýin toqtatýǵa búkil qoǵam nazaryn aýdarý kerek. Bul iske mýzykanyń kómegin de paıdaný qajet. Máńgilik muzdyqtarǵa joǵalý qaýpi tónip tur, olar erýde. Óndiris oryndarynan shyǵatyn kómirsýtegi oǵan óz áserin tıgizýde. Adamdar turmystyq tehnıkadan bas tartpasa da, energııany únemdi paıdalanýǵa barlyq kúsh-jigerdi jumsaýǵa tıis", degen pikirde.
