2050 jylǵa qaraı Ortalyq Azııada egin túsimi 30 paıyzǵa azaıady
ASTANA. 18 qazan. QazAqparat - Bul týraly búgin Astanada ótken Dúnıejúzilik densaýlyq saqtaý uıymy ilki jobasynyń qorytyndylaryn tanystyrý máslıhatynda aıtyldy.
«Klımattyń ózgerisi azyq-túlik, aýyz sý jáne aýa sııaqty adam densaýlyǵy úshin basty ról atqaratyn jaǵdaılarǵa keri áserin tıgizedi. Jalpy alǵanda, 2050 jylǵa qaraı Ortalyq Azııada egin alqaptarynyń ónimdiligi 30 paıyzǵa deıin tómendeıdi dep boljanyp otyr. Al osy kezge qaraı Qazaqstan halqynyń demografııalyq ósim, kóshi-qon jáne ómir súrý uzaqtyǵy ulǵaıýynyń nátıjesinde 24 mıllıonǵa deıin ósetinin eskersek, osy úrdister azyq-túlikpen qamtamasyz etýdiń qosymsha aýyrtpalyǵyn ala keledi», - deıdi Dúnıejúzilik densaýlyq saqtaý uıymy Juqpaly aýrýlar, qoǵamdyq densaýlyq saqtaý jáne qorshaǵan ortany qorǵaý departamentiniń dırektory Rodıer Gıýnel.
Onyń aıtýynsha, klımattyń ózgerýi Qazaqstan Respýblıkasynda da oryn alyp otyr. Mundaı ózgerister kezinde temperatýranyń kóterilýi, tótenshe aýa raıy qubylystarynyń kúsheıýi jáne jıileýi halyqtyń densaýlyq jaǵdaıyna áser etpeı qoımaıdy. Bul óz kezeginde edáýir ekonomıkalyq shyǵynǵa da ushyratady.
Osyndaı qorytyndyny Dúnıejúzilik densaýlyq saqtaý uıymynyń el ishindegi klımat ózgeristerinen densaýlyqty saqtaý jónindegi Eýropalyq aımaqtyq bıýrosy 4 jylǵa sozylǵan ilki jobasynyń qorytyndylary negizinde túıindegen.
Joba nátıjeleri klımat ózgerisine beıimdeıtin qajetti sharalardy iske asyrýǵa arnalǵan is-sharalar josparynyń ǵylymı negizin qalaıdy. QR Densaýlyq saqtaý mınıstrligi atalmysh jospardy bıylǵy qyrkúıekte aıaqtaǵan kórinedi. Osy is-sharalar densaýlyqty tótenshe aýa raıy qubylystarynan saqtaýǵa, densaýlyq saqtaýdyń qoǵamdyq júıesiniń ınfraqurylymyn jetildirip, nyǵaıtýǵa, sondaı-aq, epıdemıologııalyq qadaǵalaýdy nyǵaıtýǵa, habardy erte bastan taratyp, halyqty aqparattandyrýǵa baǵyttalǵan.
Іlki jobanyń Qazaqstanda jasalǵan negizgi qorytyndylary boıynsha, aýa raıynyń ádetten tys jylynýy túrli juqpaly aýrýlardy taratýshylardyń kóbeıip ketýine qolaıly jaǵdaı jasaıdy.
QR Densaýlyq saqtaý mınıstrliginiń memlekettik sanıtarlyq-epıdemıologııalyq qadaǵalaý komıtetiniń tóraǵasy Jandarbek Bekshınniń aıtýynsha, Laım keseli men Kongo-Qyrym qandy bezgegin juqtyrýshy keneler men kemirgishter buryn kezdespegen aımaqtarǵa taralýy múmkin.
«Bul kópten beri umytylyp ketken keselderdiń paıda bolýyna nemese olardyń qaıta shyǵýyna, sondaı-aq, ishek-qaryn joldaryndaǵy, ásirese áıelder men balalarda indetterdiń qozýyna ákelip soǵady», - deıdi elimizdiń bas sanıtar dárigeri.
