2050 jylǵa qaraı Qazaqstannyń soltústik óńirinde halyq sany mıllıon adamǵa azaıyp, ońtústikte 5,2 mln. adamǵa ósedi
ASTANA. QazAqparat - 2050 jylǵa qaraı elimizdiń soltústik óńirlerindegi halyqtyń sany shamamen mıllıon adamǵa qysqarsa, kerisinshe ońtústik óńirde bul 5,2 mln. adamǵa ósedi. Búgin Májiliste kóshi-qon úderisterine arnalǵan dóńgelek ústel barysynda Densaýlyq saqtaý jáne áleýmettik damý mınıstri Tamara Dúısenova osylaı málimdedi.
Toqtala ketetin jaıt, mınıstr keltirgen boljamǵa sáıkes, 2030 jylǵa qaraı Qazaqstan halqynyń sany 20,3 mln. adamdy quraıdy.
«Bul 20,3 mln. adamnyń 52,7 paıyzy 2030 jylǵa qaraı negizgi bes óńirge tıesili bolady. Máselen, Almaty oblysynda - 2,5 mln. adam, Jambyl oblysynda 1, 249 mln. adam, Ońtústik Qazaqstan oblysynda - 3 mln. 660 myń adam, Astana men Almaty qalalarynda 3,3 mln. adamdy quraıdy. Al osy kezeń ishinde Aqmola, Qaraǵandy, Qostanaı, Pavlodar, Soltústik Qazaqstan oblystarynda halyq sany kemı túsedi. Egerde, biz kóshi-qonǵa qatysty úderis ózgertpesten ustap tursaq, onda ońtústik óńirlerde týý esebinen halyq sany artyp, kerisinshe soltústik óńirlerde tómendeı beredi», - dedi Tamara Dúısenova.
Keltirilgen málimetterge qaraǵanda, 2050 jylǵa qaraı ishki kóshi-qon salasynda teńgerimsizdikter oryn alýy yqtımal. Máselen, 2050 jylǵa qaraı soltústik óńirlerdegi halyqtyń sany shamamen mıllıon adamǵa qysqarsa, kerisinshe ońtústik óńirde bul 5,2 mln. adamǵa ósedi. Boljamdy derekter boıynsha ońtústik óńirdegi halyqtyń qonystaný tyǵyzdyǵy soltústik óńirden 4 esege artatyn bolady.
«Sonymen qatar,ońtústik óńirlerde (Almaty qalasyn qospaǵanda) halyqtyń 38 paıyzy shoǵyrlansa, sóıte tura olardyń jalpy aımaqtyq ónimdegi úlesi 17 paıyzdy ǵana quraıdy. Al batys óńirlerde halyqtyń 11 paıyzy turyp, jalpy aımaqtyq ónim úlesi 22 paıyzdan asady. Soltústik aýdandarda halyqtyń 29 paıyzy shoǵyrlanyp, jalpy aımaqtyq ónimi 25 paıyzdy quraýy múmkin», - dedi T. Dúısenova. Bul rette mınıstr ońtústik óńirlerde adamdardyń basym bóligi saýda jáne basqa da qyzmetterge tartylsa, soltústik aýmaqtardyń ekonomıkasy jetkilikti deńgeıde saralanǵanyn atap ótti.
