2050 jylǵa qaraı Qazaqstanda halyq sany 25 mln adamǵa jetýi múmkin

NUR-SULTAN. QazAqparat – 2050 jylǵa qaraı Qazaqstanda halyq sany 25 mln adamǵa jetýi múmkin. Bul týraly QR Eńbek jáne halyqty áleýmettik qorǵaý vıtse-mınıstri Serik Shápkenov aıtty, dep habarlaıdy QazAqparat tilshisi.

«Elimizde 294 myńnan astam kópbalaly otbasy bar. Jyl saıyn Qazaqstanda týý kórsetkishi ósip keledi», - dedi vıtse mınıstr «Ana men balany áleýmettik qoldaý: zamanaýı talaptar men jańa tásilder» atty dóńgelek ústel otyrysynda.

Osy oraıda ol bala týýdy yntalandyrý ulttyq qaýipsizdiktiń strategııasy ekenin atap ótti.

«Taldaý nátıjeleri boıynsha 2050 jylǵa qaraı halyq sany 1,3 esege ósip, 25 mln adamǵa jetýi múmkin», - dedi Serik Shápkenov.

Aıta keteıik, elordada «Aýyl» halyqtyq-demokratııalyq patrıottyq partııasy halyqty áleýmettik qorǵaý máselesine qatysty dóńgelek ústel otyrysyn uıymdastyrdy.

Budan buryn habarlanǵandaı, Qazaqstan halqynyń sany 18 mln 785 myń adamǵa jetti.