2050 jylǵa qaraı elimizdiń soltústiginde halyq sany 1 mln. adamǵa kemip, ońtústikte kerisinshe 5,2 mln. adamǵa artýy múmkin
ASTANA. QazAqparat - Qazirgi úderis saqtalsa, 2050 jylǵa qaraı elimizdiń soltústiginde halyq sany 1 mln. adamǵa kemip, ońtústikte kerisinshe 5,2 mln. adamǵa artýy boljanady. Bul týraly búgin Májiliste «QR keıbir zańnamalyq aktilerine halyqtyń kóshi-qony jáne jumyspen qamtylýy máseleleri boıynsha ózgerister men tolyqtyrýlar engizý týraly» zań jobasynyń tanystyrylymy barysynda málim boldy.
«Jyl saıyn elimizdiń ishki kóshi-qonyna 337 myń adam qatysyp otyr. Onyń ishinde 146 myń adam oblystar arasyndaǵy kóshi-qondy qurasa, 191 myńy bir oblystyń ishindegi kóshke ulasady», - dedi zań jobasyn tanystyrǵan Densaýlyq saqtaý jáne áleýmettik damý vıtse-mınıstri Dáýlet Arǵyndyqov. Onyń aıtýynsha, ishki kóshi-qonnyń búgingi tańdaǵy basty problemasy - halyqtyń shoǵyrlanýyndaǵy aıtarlyqtaı teńsizdigi men el aýmaǵy boıynsha jurtshylyqtyń ornalasý teńsizdiginde jatyr.
«Bul ásirese elimizdiń ońtústik jáne soltústik óńirlerinde aıqyn kórinip otyr. Saraptamalyq boljamdarǵa súıensek, búgingi úderis saqtalsa 2050 jylǵa qaraı elimizdiń soltústigindegi halyq sany 1 mln. adamǵa kemýi yqtımal. Kerisinshe, ońtústik óńirdegi halyq sany 5,2 mln. adamǵa ósýi boljanady. ıAǵnı, ońtústik óńirlerdegi halyq sanynyń tyǵyzdyǵy soltústiktegi halyq sanynan 4 esege artyp túsedi», - deıdi vıtse-mınıstr.
Onyń aıtýynsha, ishki kóshi-qon salasyndaǵy problemalardy ońtaıly sheshýdiń eki baǵyty usynylyp otyr. Onyń birinshisi - aýyldan qalaǵa qaraı qonystandyrý, bul baǵyt Qazaqstanda tabıǵı úderispen qalypty deńgeıde júrip jatyr. Ekinshi baǵyt - jumys kúshi artyq aımaqtardan halyqty Úkimetpen aıqyndalǵan óńirlerge kóshirý. «Bul jaǵdaıda qajetti sharttar qurylyp, kóshi-qon úshin halyqty yntalandyrý tetikteri usynylady», - dedi D. Arǵyndyqov.
