2050 jylǵa qaraı álem turǵyndarynyń 67 paıyzy qalalarda turady

NUR-SULTAN. QazAqparat – Elordada «Báskelestik transformatsııasy! Ulttar – Energııa – Indýstrııalar – Qalalar – Talanttar» degen taqyryppen Ǵalamdyq ınnovatsııalyq sammıt ótip jatyr, dep habarlaıdy QazAqparat tilshisi.

Úsh kúnge jalǵasatyn sammıtke ekonomıka, qarjy, tehnologııa salasyna mamandanǵan 50-den astam halyqaralyq sarapshy shaqyrylyp otyr. Jyl saıyn álemniń ár elinde ótetin aýqymdy shara Qazaqstan astanasynda tuńǵysh ret ótýde.

Sammıttiń ashylýyna QR Premer-Mınıstriniń birinshi orynbasary-Qarjy mınıstri Álıhan Smaıylov qatysyp, sharanyń Qazaqstan úshin mańyzdy ekenin toqtaldy.

«Úkimet básekege qabilettilikti damytyp, ınvestıtsııalyq ahýaldy jetildirý úshin 8 reformalyq qujat daıyndaýda. Bul qujattar 20-dan astam reformalyq ózgeristi qamtymaq. Sonyń ishinde shaǵyn jáne mıkrobıznesti damytý sııaqty ózekti máseleler bar. Bıznestiń atalmysh salasyna túsetin salyq júktemesin azaıtý boıynsha Memleket basshysynyń tapsyrmasy bar. Osy ózgeristerdiń arqasynda bir mıllıonnan astam kásipkerdiń 3 jyl boıy salyq júktemesi jeńil bolady. BUU boljamy boıynsha 2050 jylǵa qaraı jer betindegi adamdardyń 67 paıyzy qalalarda turatyn bolady. Bul tendentsııa tehnologııa ıgilikterine qoljetimdilik boıynsha teńsizdikter týyndatpaýy kerek. Sol úshin elimizde «Óńirlik damý» baǵdarlamasy qolǵa alynǵan. Búgingi sammıt osy jasalyp jatqan qadamdardyń tıimdi tustaryn naqtylap, tarazylaýǵa múmkindik beredi», - dedi Álıhan Smaıylov.

Sammıt aıasynda sarapshylar transulttyq ekonomıkalyq baılanystar, energetıka, ýrbanızatsııa, adam kapıtaly sııaqty máselelerdi talqylaıdy.